Un edificio icono den nos enseñansa cu despues di 21 aña a keda bandona pa bira un instrumento di campañanan politico, finalmente lo haya bida bek. Ta trata di e edificio monumental John F. Kennedy cu lo conoce un renobacion completo respetando su structura original.
Awe mainta a keda firma diferente documento di parti di gobierno, AIB y Bohama cu a gana e destaho publico pa realisa e renobacion y construccion aki. E proyecto tin un balor di 15,9 miyon florin, unda nan lo renoba ex J.F.K School y hunto cu ne lo bin un edificio nobo. E trabou aki lo wordo realisa den 18 luna pa un total di 6 mil 335 meter cuadra di espacio di oficina.
Den presencia di minister di Infrastructura, Otmar Oduber, y su colega di enseñansa, Rudy Lampe, director di AIB, Francies Gil a bisa cu durante e ultimo dos lunanan tabatin un negociacion ‘basta habri y profesional’ cu gobierno cu lo huur e edificio aki pa 5 aña pa asina centralisa tur instancia cu ta cay bou departamento di enseñansa.
Apesar cu e proyecto aki a wordo concretisa bou e gabinete anterior, gobierno nobo di coalicion (MEP-POR-RED) a dicidi di inventarisa prome algun di proyectonan cu nan a hereda pa evalua nan situacion financiero. Sr. Gil a laga sa cu e acuerdo prome a wordo perfecciona, caminda e dos ministernan responsabel pa e acuerdo di huur a keda envolvi. AIB Vastgoed cu ta un compania di AIB Bank ta doño di e edificio aki y esaki ta e prome proyecto cu nan ta realisa.
