Diahuebs lider di partido POR a bay Ministerio Publico pa entrega un keho di corupcion cu terenonan publico. E ‘corupcion’ ta trata entre otro di bendemento di un tereno envolviendo Leoncita Arends. E locutor aki a desmenti esaki.
Tambe ta trata di corupcion di parti di minister Benny Sevinger segun e partido aki. E minister ta encarga cu otorgamento di tereno publico. Bon Dia Aruba ta purbando di haya su comentario, tambe ainda riba e asunto di hotelnan nobo na San Nicolas. Aunke nos a haya e contesta bek cu nos por entrevista e minister por lo pronto, ainda nos no ta tende nada for di e mandatario. Diaranson e lider Otmar Oduber di POR a hala atencion di prensa riba e documentonan cu nan a obtene over di un tereno den man di un compania cu ta riba nomber di e yiu di sra. Arends. Nan ta bisa cu a specula cu tereno, esta bende un optie riba un tereno pa 600 mil florin, di cual 485 mil florin a bay pa sra. Arends.
Bon Dia Aruba a puntra diaranson si POR lo bay entrega un keho tambe na Ministerio Publico (OM). Lider Oduber a comenta na prome instante cu nan intencion tabata pa informa comunidad di abusonan cu a y ta tumando luga. Y cu si OM ta interesa den e documentonan, pa laga sa. Pero despues e partido a opta pa bay OM y entrega un keho hunto cu e documentonan. Sr. Oduber ta bisa cu nan a pidi un cita cu e fiscal pa pasa over di e contenido.
