Desde siman pasa Diahuebs, 15 di September 2022, Departamento di Impuesto ta informa cu automobilistanan por a cuminsa na paga impuesto di vehiculo di motor 2023, asina brindando e contribuyente mas tempo y espacio pa por paga prome cu deadline di 31 di Januari 2023.
Meverly Romano, vocero di Departamento di Impuesto ta bisa cu esaki ta un paso hopi importante y DIMP ta haciendo esaki caba pa algun aña, caminda cu ta habri e posibilidad di pago mas trempan cu December. Normalmente den pasado tabata habri e posibilidad di pago na December pero aworaki tin e sistema di pago parcial cu ta brinda e contribuyente/ automobilistanan mas espacio financiero pa nan por completa nan pago di impuesto na tempo. “P’esey tambe nos ta cuminsa mas trempan pa asina facilita e contribuyentenan di e sistema aki y asina duna nan e espacio financiero cu nan mester,” Sra. Romano ta splica.
Pa aña 2023 no ta bay tin plachi di number nobo, ta bay keda usa e mesun plachinan cora cu blanco di aña 2020 cu actualmente nos ta usando. E motibo principal ta pa baha gasto di gobierno. Esey ta e motibo principal pa cual ta keda usa e plachinan cora cu blanco y no ta bay otorga sticker tampoco.
Pa esnan cu paga 2023 via banco, DIMP ta bisa pa tene na cuenta cu lo procesa e pago riba e debe di 2023, solamente si 2022 ta completamente paga. Ta pasa cu personanan ta paga 2023 via banco, pero ora e administracion ta registra e pago, ta mira cu tin añanan bieu habri, y si esaki ta e caso lo pasa e pago na e cuenta habri aki. Esey ta bay nifica cu e persona ta pensa cu su impuesto di 2023 ta paga, pero esaki no ta asina, pues mester tene hopi cuenta cu esaki pa no haya un cobransa adicional incluyendo un multa. DIMP ta enfatisa cu si bo sa cu bo tin debenan atrasa, mester clear esakinan prome cu haci pagonan nobo.
