Ora nos a kere cu henter e lunanan aki cera paden tabata suficiente tortura, ata nos mester dedica atencion na un conflicto interno, cu ta parce di por tin consecuencia serio pa e gabinete aki. Ya e no ta un conflicto interno, sino e ministro concerni no a pasa tanto ora sinta cerca Gobernador ayera. Esey ta un señal cla cu nos ta dilanti un situacion politico dificil, na un momento cu e gabinete aki lo mester tin 100% di su atencion pa e problemanan cu e crisis di salud y principalmente economico ta pone nos dilanti.
Pero enfin, ora hende ta pleita masha facil esaki por bay mas leu cu loke ta sano, sigur pa nos, pero esey no ta parce di ta e consideracion. Di banda di esnan cu ta exigiendo salida di e ministro nos ta tende cu entre otro e asunto di Serlimar lo ta e problema. Esaki por ta e caso, pero tin algun cos cu no ta bira mas transparente. Ta pleita tocante esaki, si tabata bon of no pa subi e caminda di ‘surseance van betaling’ cu por termina den un bancarota si e empresa no logra restructura su mes y su debenan. Y kico ta e gran ausente den henter e asunto? E pregunta pakico Serlimar no tin placa y ta biba di subsidio di gobierno pa varios aña caba, sin haci loke ta necesario pa sobrevivi: percura pa Aruba cuminsa paga! Ban ta honesto: e gran mayoria di Aruba, di nos anto, no ta paga Serlimar! Bin busca e placa ey, pero no na manera cu POR kier hacie, creando nan propio base di dato pa usa den campaña. Duna e cos aki den man di WEB y laga cobra esaki hunto cu recibo di awa, punto.
Pero tin mas cos cu ta hunga un papel, si nos por kere loke nos ta tende y lesa. E maneho encuanto e prohibicion di tur ATV y UTV den Parke Nacional Arikok lo a cay den mal tera, pasobra lo tabata traha riba un solucion pa e empresanan cu gana placa cu esaki, pero ta destruyendo naturalesa paden y pafor di e Parke. Por ta cu e solucion pa para entrada na e Parke completamente ta zona bastante radical, pero ‘habri man laga bay’ na e momento aki tampoco ta parce nos un opcion razonable. Tur hende cu dos placa di tino y cu ta cana wowo habri por mira e destruccion cu ta tumando lugar riba nos isla. A lo largo esaki ta destrui tambe e pan di e mesun empresanan aki tambe, pero ta parce dificil pa nan comprende esey, anto e ora otro hende lo mester bisa nan. Y esey lo mester ta e mandatario, cu nos ta paga pa haci esey.
En todo caso, ta parce cu e caha di Pandora a habri caba, y e oponentenan den e caso aki a tuma nan posicion, excluyendo asina un posible solucion negocia. Y si dentro di un partido no tin voluntad ni tactica pa negocia, anto e pregunta ta con ta haci esey cu otronan cu no ta di e partido. Lamentablemente, e no ta un asunto interno mas. Ora un partido pidi su propio ministro pa baha, e por haci esaki si e ta di acuerdo. Den e caso aki e no ta asina y e no ta mira motibo pa haci esey. Anto e ta bira un asunto pa parlamento, unda no sin mas e partido concerni por conta cu un mayoria pa logra salida di e ministro. Si esey resulta asina, anto ta keda e partido un arma so y esey ta pa kibra e gabinete. Esey ta un decision mas dificil pa tuma ainda, pasobra e ora ta tumba un gobierno, sin cu sikiera oposicion a pasa eybanda, anto e partido ta tuma un responsabilidad hopi grandi pa su cuenta, cu por tin consecuencia desastroso pa nan mes den un eventual eleccion, unda nan lo carga culpa pa baha un gobierno den pleno crisis. Anto esey pa un partido cu a haya golpi caba den ultimo eleccion unda no a haya ni remotamente e cantidad proyecta di voto.
Sin embargo, busca un salida negocia, unda ta bandona e idea di un mocion di desconfianza, no por ta otro cu pone e partido y su actual lider den un posicion di debilidad, unda a purba imita un leon y finalmente a sali un gatito manso. Den politica e tipo di actuacion aki ta mortal den vista di pueblo. Cu esaki, e partido a maniobra su mes den un posicion imposible, ‘entre la espada y la pared’ manera esnan di habla hispana ta bisa, anto esey completamente voluntario… Tur decision practicamente desde e momento aki, ta resulta negativo pa e partido.
Pa e ministro sali di e partido y keda como ministro, ta un posibilidad teorico cu no ta parce asina viable. Pa esey e emocionnan ta parce di a bay demasiado halto caba y e partido no lo acepta esey. Y logra cu e otro partidonan den e coalicion ta aproba retiro di e ministro, sea den conseho di ministro o den parlamento, ta parce un posibilidad remoto. Sali di e impasse aki significa scoge entre mal opcion cu nan mes a crea.
