Pone e studiante Arubano central?

Den tur campaña electoral nos ta tende di plan (no nobo) pa pone mas atencion na e situacion di nos studiantenan, principalmente esunnan den exterior. Tur partido ta comparti e preocupacion cu ta solamente un parti di esunnan cu bay exterior ta bolbe. Y e parti cu tin un diploma den nan man ta mas chikito ainda. Ta toca tema manera problema cu pago di debe, problema pa haya trabao, etc. Tur ta papia tambe di e anhelo di tur studiante pa bolbe cas  ‘pa contribui na nan pais’, presuponiendo cu ta esey ta loke tur e hobennan ey ta desea.

Por cierto un monton di pregunta cu den e afan pa mustra atencion y preocupacion pa e studiante, y e posterior bentaha politico di esaki, no semper ta haya contesta den un analisis contundente. Laga nos supone cu en berdad mayoria di nos studiantenan ta bay studia pa bolbe nan pais. Laga nos pone un banda si ta pa contribui cu nan pais, o pa sigui nan desaroyo personal cu nan ta busca. E ora nos mester cuminsa cu puntra ta kico nan a bay studia, cu ta duna nan bista riba empleo futuro den nos economia.

Pregunta: gobierno tin un analisis y un plan ki tipo di estudio nan ta faborece cu prestamo, pasobra esaki nan ta cuadra cu e tipo di profesional cu nos economia mester? Ta exclui prestamo pa estudio cu absolutamente nos no mester? Y si acaso nos ta duna prestamo pa studia algo, consecuentemente nos ta honra e diploma cu nan a obtene? Djis tira un bista riba e trato di e mediconan studia den nos region y nos por conclui cu ta bira tempo pa cuminsa cuestiona esnan cu a todo  costo kier mantene e sistema Hulandes, si nos no ta biba den e realidad ey.

Despues di tanto aña di discusion en vano, nos no por haci nada mas cu constata cu practicamente no tin avance den e asunto aki. Ni tampoco den un registracion transparente di esunnan cu ta studia y ta bira interesante pa mercado laboral local. Si bo tin un empresa cu mester di cierto tipo di profesional, y bo kier emplea Arubano hoben recien gradua, unda bo mester acudi pa bo por tin un bista riba loke ta graduando o a gradua recientemente?

Aña 2017 ta yegando na mita, y nos gobernacion ta trahando ainda ‘cu pik y shobel’, unda lo tabata normal pa nan tin un website drechi cu e informacion ey.  Kico ta e esfuersonan cu ta haci sistematicamente pa tin tur studiante den un database accesibel pa nan mes tambe, cu por duna informacion valioso na gobernacion mes y na sector priva? Nos no ta referi na tal o cual dia di encuentro cu studiante pa saca potret den corant despues, gabando ‘con bon e ministro Plenipotenciario ta haci su trabao.’ Nos ta papia di e trabao silencioso y sistematico di procesa informacion accesibel pa e ciudadano, pasobra ta esey ta esencia di gobernacion drechi, y no e propaganda momentaneo di e ministro Plenipotenciario di turno.

Pero esaki no ta tur.  Nos tin estudio serio di kico realmente nos economia ta exigi na empleado di nivel HBO y universitario? Nos ta tende hende (politico) ta papia di aumenta e porcentahe hopi abao den nos comunidad y economia di esunnan cu formacion na e nivel superior ya menciona. Y hasta tin di nan a yega asina leu cu nan ta papia di ‘kenniseconomie’… Mientras tanto, nos no ta mirando practicamente nada ta sucede cu por dirigi nos den direccion di e soño bunita aki.

Un ehemplo: desde mas di un aña ta papiando y trahando riba reapertura di e refineria. Esaki por significa bastante cupo di trabao na nivel tecnico superior, mas cu den un hotel, nos ta supone. Nos a mira o tende di un plan pa stimula hende hoben pa sigui studia den e careranan aki? Nan tin prioridad pa haya prestamo? Pasobra si bo ta bisa cu bo a sigura un industria moderno (o modernisa) pa 25 aña, no ta aki bo mester a ‘cash in’? Nos ta publica tur recado di prensa di gobernacion, pero nos no por corda di a lesa algo al respecto. O, por ta cu nos ta mira e cos completamente robes y no ta nota cu tin plannan pa inunda Aruba cu personal di exterior, a pesar di e ‘Citgo Desk’ cu nan mes a institui, como concesion na opinion publico?

Bon mira, nos ta pega di dos banda den e asunto aki. Uno, ta e creacion di actividad economico cu tin demanda relativamente grandi pa trabao na nivel superior cu ta paga salario halto. Dos, ta loke nos mester haci pa por tin suficiente hoben studiando y studia den e direccion desea. Nos por duna beca pa studia ‘historia di arte’ por ehemplo, pero cu esey nos no ta gana guera. Y nos a pasa e momento unda nos por a keda contento cu un promesa vago di e politico cu e ta desea ‘lo mejor’ pa nos hobennan. Laga nan aterisa y splica mas en detaye kico nan ta bay haci.