(AP)–E aire ta hole kima na Lahore, un ciudad na Pakistan cu tabata famoso pa su hardinnan pero awo a bira notorio pa su calidad di aire teribel.
Niebla toxico a enferma diesmiles di hende durante e ultimo lunanan. Vuelonan a ser cancela. Yobida artificial a ser desplega na december pa combati e niebla, cual tabata e prome biaha cu esaki a ser conduci. Pero ta parce cu nada ta trahando.
Lahore ta den un area “airshed” unda polutantenan for di industria, transportacion y otro actividadnan humano ta keda pega debi na clima local y topografia pues nan no por dispersa facilmente. Airshed tambe ta contribui na polucion transforentisa. Bao cierto condicion di biento, 30% di polucion den e capital Indio, New Delhi, por bin for di e provincia Punjab di Paksitan, unda Lahore tae capital. Tin seis area airshed na Sur Asia, cual ta hogar di hopi di e ciudadnan mas poluciona na mundo.
Expertonan ta haciendo un yamado pa cooperacion transforentisa entre paisnan manera Pakistan, Bangladesh y India pa adresa polucion di aire hunto en bes di traha na silos a base di ciudad pa ciudad. Pero esaki ta un yamado dificil mirando e tension entre e regionnan aki.
Relacion entre India y Pakistan ta kibra. Nan interaccion ta yena cu animosidad y sospecho. Nan a bringa den tres guera, a establece ehercitonan y a desaroya armanan nuclear. Restriccionnan di biahe y burocracianan hostil ta mantene hende for di crusa e frontera pa vakantie, estudio of trabao, aunke e paisnan ta haci excepcion pa peregrinacionnan religioso.
E causanan y problemanan ta mescos ambos banda di e frontera Indio-Pakistani, pues no tin sentido pa un provincia implementa medidanan si un provincia den bisindario na e otro banda di frontera no ta adoptando e mesun practicanan. Forumnan internacional y regional ta ofrece oportunidadnan pa discusionnan honesto tocante polucion di aire, hasta si gobiernonan no ta trahando hunto directamente of publicamente.
“Maneho di airshed mester un plan regional, segun analista Pakistani Abid Suleri, for di e NGO Sustainable Development Policy Institute. “Pero 2024 ta un aña di eleccion na India y Pakistan, y cooperacion entre gobiernonan no a yega e nivel ey.”
Pakistan falta algun siman pa vota den un eleccion parlamentario nacional. Te awo, solamente e ex-minister di asunto den exterior y lider di partido politico Bilawal Bhutto Zardari a priminti inversionnan den adaptabilidad di clima, siguiendo e inundacion cu a resulta den mas cu 1,700 hende morto.
Na India, polucion di aire no ta un asunto importante cu hendenan lo bay vota p’e, segun Bhargav Krishna, un fellow Sustainable Futures Collaborative think-tank na New Delhi. Pero e experencia of efecto di clima por haci hende mas consciente tocante con nan ta vota.
