Politiconan ta critica decision di presidente di parlamento pa suspende tratamento di presupuesto despues cu a entrega amienda di AVP y Futuro

Manera ta conoci, diabierna ultimo Parlamento di Aruba a cuminsa trata presupuesto nacional di pais Aruba pa 2025. E reunion publico no a yega mucho leu, ya cu el a inicia cu entrega di un amienda presenta pa fraccion AVP y Futuro. Presidente di parlamento, Gerlien Croes, a suspende e tratamento di presupuesto pa manda e amienda pa e organonan consultativo pa conseho. Esaki no a cay den bon tera pa demas fraccionnan den parlamento.

A traves di comunicado di prensa miembronan di fraccion di MEP, Rocco Tjon y Dangui Oduber a expresa nan disgusto riba e manera con Croes a hiba e reunion, y despues suspende esaki. Durante un conferencia di prensa parlamentario y lider di fraccion PPA, tambe a expresa su malcontento pa cu esaki.

Parlamentario Tjon a indica cu durante e prome reunion publico pa trata e presupuesto, tabata toca turno na su persona y minister Geoffrey Wever pa contesta pregunta relaciona cu e presupuesto di e ministerionan cu nan ta representa, cual no a sucede pa motibo cu e reunion a ser suspendi.

El a remarca cu Croes a vocifera cu e ta para pa politica moderno, caminda ta respeta e organo di Parlamento di Aruba y cu e presidente di parlamento mester traha igual pa tur partido. Sinembargo, parlamentario Tjon a indica cu e presidente di parlamento, contrario na loke el a vocifera anteriormente, a kibra regla den parlamento.

“Sra. Gerlien Croes ta laga cera [microfon] di miembronan di parlamento simplemente pasobra e ta di opinion cu e no tin di haber cu e topico. E ta cera mic di parlamentarionan mientras nan ta hiba nan disertacion y splica dicon nan kier vota na fabor of contra un ley. Kibrando asina e reglamento di ordo. Y tur esaki a culmina diabierna ultimo ora el a cera reunion, lagando tur parlamentario cu palabra den boca, caminda a nenga nan di hiba palabra, trece punto di ordo y alabes entrega amienda,” el a indica.

Segun parlamentario Tjon, for di su punto di bista, tabata cla cu Croes y Mike Eman, lider di fraccion AVP, a haci palabracion adelanta pa “secuestra e presupuesto un bes mas.”

El a expresa cu fraccion MEP tabata desapunta y preocupa pa e forma con Croes “a mina parlamentarionan pa hiba palabra, mina nan derecho di entrega amienda y no duna lider di fraccion di MEP oportunidad pa duna su punto di ordo.”

Pa motibo di esaki fraccion MEP a entrega un carta na Gobernador di Aruba SE Alfonso Boekhoudt den cual e fraccion ta expresa nan preocupacionnan. Ademas, el a agrega, fraccion MEP a entrega otro carta na presidente di parlamento pa duna nan tur corespondencia entre su persona, den su funcion como presidente di parlamento, y Raad van Advies, CAft, Directie Fiancieen y minister di Finanzas, pa nan por monitor e proceso di e consehonan cu e instancianan aki ta emiti.

Parlamentario Dangui Oduber tambe a expresa su malcontento pa su e situacion aki. El a indica cu for di aña pasa Gabinete Wever-Croes II e entrega e presupuesto na tempo na parlamento pa e ser trata, pero Croes “a secuestra e presupuesto 2025 di pais Aruba desde cu el a bira presidente di parlamento.”

Parlamentario Oduber a remarca cu despues di tres luna, y cu a ricibi carta di CAft y instruccion di Conseho di Minister Reino, el a yama reunion pa trata e presupuesto, cual tampoco no a sucede ya cu e presidente a suspende e reunion despues cu parlamentario Eman a entrega e amienda.

“Loke ta condenabel ta e hecho cu Mike Eman tabata e prome orador y tabatin varios orador a inscribi nan nomber pa hiba palabra y algun miembro di fraccion di MEP tambe kier a presenta un amienda cu cambionan den e presupuesto 2025. Loke Sra. Croes a haci diabierna ultimo ta actua como un dictador. El a nenga lider di fraccion di MEP un punto di ordo, el a kita e derecho di tur otro 20 miembro pa entrega un amienda y demostra su cara real cu ta un presidente di parlamento di AVP y no un presidente di parlamento di Aruba,” el a indica.

Parlamentario y lider di fraccion PPA, Otmar Oduber, tambe a trece dilanti e mesun punto durante su conferencia di prensa dialuna mainta. El a indica cu presidente di parlamento y lider di partido Futuro Gerlien Croes, cu a bisa cu lo tin un otro tipo di politica y cu lo actua corecto, a tuma un amienda riba e prome dia di tratamento di presupuesto, pero no a tuma amienda di e resto di fraccionnan cu ta den parlamento.

El a cuestiona e decision di e presidente di parlamento bisando cu e “kier hunga un wega politico, kier haci show politico pasobra bo ta formando gobierno y ta interumpi tratamento di un presupuesto, cual ta ilegal den e caso aki.”

E lider di fraccion PPA a indica cu si e presidente di parlamento tabata sincero, si di berdad Futuro, cu e ta representa como presidente di parlamento, kier tabatin un politica diferente, lo mester a scucha di e otro fraccionnan pa wak si tin mas amienda ta bay drenta pa ser manda Raad van Advies, pa asina tur ser manda hunto, pa por trata esakinan.

El cuestiona tambe si na momento cu continua cu e amienda, e lo desea di wak si fraccion PPA of MEP entrega amienda, si e presidente di parlamento lo suspende e reunion publico atrobe pa manda e amienda Raad van Advies pa haya conseho manera cu e ley ta exigi. “E ora nos no ta yega na 31 di maart y e ora nos tur sa kico ta sucede, Hulanda lo tuma su pasonan,” el a menciona.

“Bo ta abusa, mi tin cu bis’e manera cu e ta, como presidente di parlamento, como Futuro cu a priminti un politica nobo, bo ta usa atrobe inteligencia di e comunidad aki, bo ta mal usa inteligencia di e comunidad aki, bo ta core entrega un amienda, core mand’e Raad van Advies pa e bin back pa trata e presupuesto, pero bo ta lubida cu democracia ta exigi pa e otro fraccion tambe entrega nan amienda,” el a remarca.