DEN HAAG – Diferente partido politico na Hulanda for di añanan ‘80 ke para yegada di Antiano cu poco perspectiva. Cobrado di uitkering, causando di molester y un importacion di criminal, nan ta bisa. E plannan ta pa gana asiento of no?

Cuarenta aña caba politico na Den Haag ta lucha pa un ley cu por para migracion for di islanan Caribense y specialmente Corsou. Ultimo pia cu VVD a purba esaki tabata cu e ley di Bosman. E aña aki PVV ta purba di manda ‘Antiano criminal’ bek. Ainda no por haya sosten pa e tipo di leynan aki den Tweede Kamer.

Roos Leerdam-Bulo di Vereniging Antilliaans Netwerk ta mira bek riba e añanan tumultuoso. “Geert Wilders cu ta apela pa bende e islanan riba Marktplaats. Rita Verdonk cu su plannan. Hasta e mester a sali for di nos sala durante un dialogo cu nos a organisa cu Antiano, pasobra publico a rabia masha. Media Hulandes tambe a yuda criminalidad Antiano.”

Antiano cu poco perspectiva of sin chens
Dos siman pasa ainda den politica tabata papia di tene Antiano cu poco perspectiva of sin chens afo na munisipio di Leeuwarden. “Poco perspectiva kico?” Roderich Pieters, ex minister plenipotensiario di Kòrsou ta puntra. “No bin bisa mi ku aki na Hulanda bo no tin perspectiva. Loke ta lubida di bisa ta cu tin hopi Antiano cu masha bon educacion ta biba na Hulanda.”

‘Nos ta un di e minorianan di mas exitoso na Hulanda’ -Roderick Pieters

“Esaki ta un framing asina negativo. Nos ta un di e minorianan di mas exitoso na Hulanda. Nos tin tur sorto di medico famoso, deportista famoso, artista y profesor di descendencia Antiano. Nunca bo no ta tende nan papia di esaki”, Pieters ta enfatisa “Nobenta porshento di Antianonan ta exitoso.”

Cifranan di CBS di 2008 ta mustra e trent cu Antiano ta pertenece na e minoria di miho educa. Y segun e Oficina di Planificacion Social Cultural (2017): e grupo di poblacion cu ta integra di mas lihe y ta sinti su mes na cas na Hulanda. Probablemente lo trata e ley controversial di PVV e aña aki.

Politiconan na Den Haag ta trata di score asiento riba lomba di Hulandes Caribense, asina Pieters y Leerdam-Bulo ta conclui. Probablemente e aña aki mes lo vota pa e plan di PVV pa manda Hulandes Caribense cu un strafblat bek pa nan isla natal.

“No ta pa show”, Sietse Fritsma di PVV ta bisa. “E estadisticonan ta asina grave cu bo no por bisa esaki. Antianonan ta representa pisa den e cifranan di criminalidad y ya tin decena di aña cu no ta haya solucion.”

Hulandesnan di descendencia Antiano di tur grupo di poblacion mas tanto ta sospechoso di un crimen. Esey a sali for di e Rapport Anual di Integracion di e Oficina Central di Estadistica di aña pasa
“Pa nos e proteccion di siguridad ta e unico motibo pakico nos ta haci esaki. E islanan tin un ley asina caba”, Fritsma ta enfatisa.

‘Na Hulanda niun hende no tin cunes cu e islanan’
André Bosman di VVD tambe a haya hopi critica cu su ley di Bosman. “Tende, na Hulanda niun hende no tin cunes cu e islanan. E hendenan aya ta bisa: bo ta haci esaki pa gana voto. Wel, VVD ta gana sero voto cu empeño pa e area Caribense.”

“Mi ta haci esaki pasobra nos tin un responsabilidad pa Reino y no pa pester. Tin suficiente placa na e islanan, pero ta mors cu ne.”

“E fail aki [Relacionnan den Reino, red.] nos ta haci cu amor pa e islanan”, e miembro di SP Ronald van Raak, cu como miembro di Tweede Kamer tin 15 aña cu e ta envolvi den e islanan, ta confirma. “Nunca mi no a haya un voto pasobra mi ta mete cu e islanan. Mi ta hopi ocupa como parlamentario, pasobra mi tin otro fail tambe manera Asuntonan Interior y Husticia. Cada seconde cu mi no tin nodi di ocupa mi mes cu e fail aki ta un bendicion.”

“Tin solucion sigur”
Pieters tin experencia den cuido di adikcion, a train polis i a traha 23 aña como consehero pa gobierno Hulandes si ta trata di maneho di integracion. Segun Pieters danki na subsidio di gobierno añanan largo a traha bon cu casonan problematico. Despues di 2014 e placa no a bini mas.

“Envolvi Antiano. Bo no ta bay traha maneho pa hende muhe cu solamente hende homber tampoco.”-Roderick Pieters

Den cierto caso mester di guia. Antes organisacionnan Antiano tabata haya subsidio pa yuda y esaki tabata bay bon. Si bo ta busca un solucion pa Antiano envolvi nan. Bo no ta bay traha maneho pa hende muhe, cu solamente hende homber cu ta manda den e maneho ey? Si Den Haag tin miedo di malversacion, mi ta bisa: laga un organisacion independiente maneha e placa y laga nos haci e trabou.”
Leerdam-Bulo tambe ta boga pa e subsidionan bini bek. “Tambe pa informa nos propio comunidad. Mi tin miedo pa e studiantenan cu awor ta bin studia aki, pa nan no frustra. Bo ta bin studia aki y bo ta tende cu nan no ke bo aki. Esaki ta distrai bo di bo meta.”

‘Hulanda ta trata di traha un muraya invisibel pa Antiano’
“Mi ta compara tur e proposicionnan di ley di ultimo cuarenta añanan cu e relato populista di e presidente Mericano Donald Trump”, LeerdamBulo ta bisa. “E ta reprocha Mericanonan cu keto keto nan ta bin horta trabou di Mericano cu ta traha duro y ta p’esey mester bini un muraya halto cu ta tene nan afo na frontera. Naturalmente esaki ta trece hopi emocion cerca e apoyo politico, pasobra ta facil pa visualisa un reproche asina.”

“Mescos ta conta pa nos Antianonan cu tur e proposicionnan di ley aki na Hulanda. Nos ta asina yama criminal y mester bini un muraya anto, pero uno cu ta invisibel.”

Hulandes Caribense tin algo di teme?
Segun Pieters y Leerdam-Bulo ‘no obstante tur e politica di popularidad no tin nada di teme pa e comunidad Caribense. “Raad van State cada be a mustra cu e proposicionnan di ley ey no ta alcansabel”, Pieters ta bisa.

“Ta un sorto di Hulandes so tin. Tanten cu Statuut, cu ta regla relacionnan den Reino Hulandes no cambia, nos no tin nada di teme”, segun leerdam-Bulo. “Politico Hulandes por keda grita, ma nan no por haci nada.”