Actualmente nos por ta testigo di un enfrentamento entre dos politico encuanto e tema di maneho di desperdicio. Den e discusion ey e actual ministro encarga cu e cartera aki a yama su contrincante un’politico irelevante’. Sin scoge banda den e asunto, nos a gusta e concepto aki di relevancia o irelevancia pasobra e ta di aplicacion na varios aspecto aki. Lagando un banda si e mandatario tabatin razon cu su rival politico no ta relevante, esey ta na e votador pa dicidi, kico asina si ta relevante? Como punto importante ta aparece inmediatamente e maneho general di procesamento di desperdicio. Loke nos por mira ta cu, aparte di e storianan bunita cu nos ta tende, no por mira un plan coherente ainda. E punto cardinal aki ta, kico realmente nos kier haci cu e desperdicio cu nos ta produci. Y kico nos ta mira ultimamente? Cu ta pone enfasis riba recoleccion di desperdicio, y no riba e demas procesamento, sin atende e destino final di mayor parti di e monton enorme cu nos ta produci.
Bo por pone cuanto baki den cuanto un bario cu bo ta desea pa recoge desperdicio, esaki no ta contesta e pregunta kico ta bo maneho en general pa deshaci na un manera responsable di e totalidad di desperdicio cu nos tin; nos no ta papia di recoge desperdicio aki, sino di kico haci cune despues. Den e cuadro aki e politico marca como ‘irelevante’ a trata den pasado recien di introduci un incinerador grandi pa kima gran parti di e desperdicio, cu lo a trece cune yen di otro problema cu no a haya contesta. Entre otro ta ken mester a bay gana placa cu algo cu nos mester a paga. En todo caso e plan ey no a cristaliza, felizmente, pasobra e por a hiba nos den direccion di, envez di deshaci di desperdicio, bira importador di material di otro teritorio pa por mantene e proceso di kima sushi. Den e sentido aki por papia di ‘irelevancia’ di e modelo ey. Sin embargo, bisando esey ainda nos no a contesta – di forma relevante – e pregunta clave: Con nos ta deshaci di un forma responsable di loke nos tin na desperdicio? Ta inimaginable cu ta continua cu deramento di desperdicio na Sero Teishi, y nos ta sigur cu lo core bisa nos cu “esey ta djis un solucion temporal”… Nos ta spera di berdad cu esey ta temporal pasobra nos ni kier pensa mes kico ta bay pasa si e caracter temporal ey bira permanente. E peligro cu nos ta mira ta hustamente esey ta bay pasa y cu e asunto ta bira ‘superrelevante’.
Pa ta husto den e discusion aki mester menciona cu tin inciativa pa atende e problema cu e alternativa ‘bieu’ na Parkietenbos ta presenta, cu ta sirbi te awe como e modelo ‘no sostenible’ di maneho. Mientras por tin comprension pa e meta cu a scoge, aparentemente, di converti e sero den un parque solar, esey ta meramente un solucion di un problema di pasado, pero ta laga atrobe e futuro sin discuti. Ta surgi awor ademas e interogantenan tocante con ta maneha esaki den preparacion pa yega na e fase final, tumando na cuenta e existencia di centenares di quimico y material toxico, entre otro gran cantidad di asbest cu a dump na e lugar durante casi un siglo, sin ningun criterio o maneho. E problema di Parkietenbos no ta haya solucion mediante escogencia di un o mas empresa local liga politicamente, sino via envolvimento di partner serio di exterior cu por trece e experticio necesario pa por actua cu efectividad. Nos no a mira esey ainda. Y mientras nos ta sperando un respuesta, ainda no a contesta e pregunta clave: Si tin varios alternativa cu mester considera no aplicable, y por lo tanto irelevante, kico si ta bay haci? Core rond den bario pa saca potret cu ciudadano ta mustra bunita, pero den loke ta trata aki, esey ta mas bien ‘campaña tempran’ y ta mustra cu e politica ta keda stanca den e fase di recoleccion y ta anto, ‘irelevante’…
Separa desperdicio?
E inquietud cu ta lanta awor ta: kico si por ta relevante? Pa cualkier maneho responsable di desperdicio nos mester cuminza pensa riba separacion di desperdicio na cas, y negoshi. Si nos ta keda insisti di no educa nos pueblo y djis duna hende un aplauso pasobra riba un diadomingo nan ta aparenta ciudadano responsable poniendo nan desperdicio – sin separacion algun – den container ofreci, nos no ta logra nada y ta scapa gobierno di e responsabilidad di desaroya maneho riba e tereno aki. Ta e separacion di desperdicio na e origen mester facilita e acumulacion specifico di material cu por exporta, o procesa localmente a traves di e companianan specializa den esaki. Nan no por depende solamente riba loke nan ta recolecta nan mes, perdiendo tur loke ta contamina e monton grandi cu ta termina na Sero Teishi.
Kico ta e problema di fondo aki? Cu nos no ta mira ningun politico, ni mandatario, ni ex-mandatario, cu ta bira ‘relevante’ den e sentido di papia di e cosnan cu realmente mester tuma lugar. E razon pa esaki ta obvio: ningun di nan tin gana di conta pueblo cu ta spera un esfuerzo di nan banda, ni tampoco con ta compensa e esfuerzo exigi cu maneho di gobierno cu ta brinda perspectiva real. Den e sentido aki nos ta keda manca cu politico, y politica, cu lo resulta ‘irelevante’ pa nos avance como comunidad. E problema mes si a keda sumamente ‘relevante’…
