PHILIPHSBURG – Ayera e Task Force di anti-corupcion TBO a detene e politico di St. Maarten Theo Heyliger na su cas algo prome cu 8or di mainta in conexion cu e investigacion “Larimar”.
E oficialnan a rista su cas y a confisca un serie di documentonan y portadonan di data. Heyliger lo wordo interoga te cu e wordo hiba dilanti un hues di instruccion, kende lo determina si e aresto ta wordo haci segun ley di e pais.
Como parti di e investigacion Larimar e consultor Hulandes R.M (64) a wordo sospecha di presunto di soborno di e ex minister di infrastructura y awo miembro democratico di parlamento Theo Heyliger entre 1 augustus y 9 september 2011.
Segun un acusacion formal cu a wordo entrega na e sospechoso pa Ministerio Publico aña pasa, R.M a paga Heyliger 300,000 dollar pa cumpra un real estate 260,000 dollar traves di Caribbean Advice and Consultancy Ltd. y 40,000 dollar traves di Advanced Consultech SA pa persuadi Heyliger pa otorga contractonan gubernamental pa empresa di draga Devcon TCI Ltd. y e empresa di construccion Volker Construction International BV/Volker Stevin Caribbean NV.
Ministerio Publico ta responsabilisa Heyliger pa acepta soborno di un total di 300,000 dollar, sabiendo of rasonabel sospechando cu esaki a wordo ofreci na dje pa persuadi su persona pa actua contra cu deber , esaki a wordo declara den e acusacionnan di R.M.
R.M. ta wordo acusa di intento si soborno na otro funcionarionan di gobierno, y tambe ta wordo sospecha di labamento di placa na un balor di NAf.8,987,532 desde 1 di januari 1997, y no a entrega e impuesto , e impuesto over di e volumen y negoshinan y e impuesto di ganashi desde 23 di augustus di 2006.
R.M. a wordo aresta pa servicionan di inteligencia fiscal e investigacion FIOD na Rotterdam, Hulanda dia 23 di augustus 2018, a base di e peticion di TBO y el a wordo translada pa Sint Maarten aña pasa pa keda interoga den caso Laimar. Tambe recientemente R.E y miembro di famia G.P. a wordo aresta den conexion cu e caso aki.
