Ayera durante un conferencia di prensa politico Otmar Oduber di plataforma pais a duna un actualisacion ariba loke ta pasando cu caso Flamingo, caso den cual Oduber ta e sospechoso principal di varios acusacion.

Oduber a trece dilanti cuater punto den cual e ta expresa cu loke ta pasando na e momentonan aki relacion cu caso Flamingo ta inhusto y un desbentaha pa su persona como sospechoso den e caso aki.

El a splica cu manera ta conoci a dura mas cu ocho luna pa interogacion di testigonan por a cuminsa despues cu e hues cu a wordo apunta na Hulanda na november aña pasa a aproba un lista 30 testigo pa wordo scucha di nobo, y un di nan e hues mes a pone atencion riba dje, cu ta ex minister Marisol Lopez.

Prome punto cu Oduber a trece dilanti ta cu despues di e espera largo, ora cu mester a cuminsa scucha e testigonan na comienso di e luna aki, lamentablemente a resulta cu un di e testigonan principal den e caso, un funcionario policial, a fayece. Segun Oduber ta señala, e testigo aki a traha shete rapport falso cu no tabata cuadra cu realidad.

Siguiente punto ta cu siman pasa Ministerio Publico a manda carta pa hues comisario pidiendo pa mantene e identidad di e miembro di RST cu segun Oduber a traha un rapport completamente falso, rapport di TCI, anonimo.

El a indica cu a traha e rapport aki, den cual Oduber ta subraya tabatin falsificacion, cu a wordo pa bisa cu Oduber a otorga e tereno di e hotel Hyatt Place pasobra tabata hendenan cu tabata financia campaña di Oduber.

E politico a resalta cu tereno no ta erfpacht, pero ta un tereno propio y cu el a wordo entrega na 2015, mientras cu Oduber a bira minister na final di 2017.

Di tres cu el a trece dilanti ta cu ora cuminsa cu interogacionnan a resulta cu Parlamento a pasa un BW nobo cu ta bisa cu ora cu tin interogacion di testigonan, e sospechoso den e caso no mag di ta presente mas, solamente e abogado por ta presente.

Por ultimo, el a denuncia un biaha cu e tempo cu a a tuma pa trata e caso, como tambe pa interogacionnan di testigo tuma luga tabata demasiado largo y inhusto y cu esaki “hamas y nunca” lo a pasa. El a menciona cu na Hulanda tur e proceso di interogacion ta pasa den dos siman y no mester warda casi 10 luna pa cuminsa cu interogacion di testigo, pero como cu ta na Aruba, y como ta trata un politico, cosnan no ta cana manera debe ser

“E ta inhusto totalmente y den e caso aki nos a bisa nos ta sali afo haci denuncianan aki pasobra no por ta posible cu bo ta mira discriminacion ta tuma luga den nos sistema hudicial aki na Aruba. Ley mester conta pa tur hende igual,” Oduber a subraya.