For di dialuna ultimo, parlamentario independiente Gerlien Croes a hala atencion usando e hashtag #TransparenciaUnionyRespet, TUR.

E mesun dia, Croes a post simplemente e palabra TUR riba su pagina di Facebook, cu un fondo color berde-blauw. Esaki a hala atencion di su siguidornan, cu mesora a cuminsa puntra e parlamentario si TUR ta bira su partido politico nobo. Asina mes, e no a duna mas informacion.

Te cu ayera, unda el a post riba su rednan social, y a manda via e-mail pa medionan di comunicacion, un invitacion pa diadomingo awo. “Invitacion na boso TUR!” el a skirbi, hunto cu e mesun hashtag, cual ta insinua cu su partido lo hiba e nomber di Transparencia, Union y Respet.

Un di su siguidonan, deseando e hoben politico exito, a comenta cu “ta tuma hopi curashi pa dicidi pa bay pa e stap aki.”

Por recorda cu mei di aña 2023, Gerlien Croes a retira di partido AVP pa keda como un parlamentario independiente. E tempo aya, Croes a manda un carta dirigi na lider di e partido aki, Mike Eman, unda el a informa di su retiro treciendo varios punto dilanti, manera e diferencia di pensamentonan y sentimentonan entre esnan mas hoben y otro coleganan.

Croes a bisa cu el a uni su mes como candidato oficial di partido AVP “cu expectativanan halto y cu hopi animo pa sirbi nos pais cu e compromiso di partido pa rehubenece e organisacion y crea un espacio y plataforma pa e voz di un generacion nobo den politica na Aruba.” Sinembargo, el a bisa cu “e cambio aki no a refleha manera nos a pensa y spera durante e presentacion di lista di candidatura pa eleccion 2017; e resultado di votonan a mustra diferente y na fabor di e hobennan.”

Croes a bisa e tempo aya cu cu tempo el a bin reconoce cu e diferencia di pensamentonan y sentimentonan entre esnan mas hoben y otro coleganan tabata creciendo y cu el a encarga su mes di vocifera esaki continuamente cu e unico meta “pa partido laga los di custumber y refleha cambionan real pa modernisa formanan di hiba politica na bienestar di pueblo y Aruba su futuro.”

Pero e diferencianan den e organisacion pa pensamento y opinion a keda haciendo e situacion no solamente mas complica sino tambe “frustrante” pa su funcionamento den partido y fraccion. Incidentenan manera e situacion cu a presenta den Parlamento pa e caso di parlamentario Mike de Meza y ex-minister di partido MEP Eddie Briesen, ademas di e partijbijeenkomst di 17 di april 2023, mas diferencianan di opinion pa loke ta trata integridad a culmina un etapa unda hasta a cuestiona y ataca su principionan, manera el a sigura.

“Despues di deliberacion, lamentablemente mi persona no a keda convenci cu realmente e cambionan aki lo tuma luga, pa tal motibo mi a yega na e conclusion cu no ta keda na mi persona otro alternativa di distancia mi mes di partido AVP entregando mi retiro, considerando cu mi no ta reconoce mi mes den e vision y forma di pensa y hiba politica di partido. Lo mi continua cu mi contribucion den politica pa e bienestar y porvenir di pais Aruba y henter comunidad en general.” Cu su retiro, partido AVP a keda cu cinco asiento den parlamento, despues di retiro di Ryçond Santos do Nascimento, pa motibonan similar.