E topico di RAft ta keda uno relevante pa Aruba. Pueblo ta en espera di kico lo ta e decision final cu lo ser tuma pa loke ta e trata e ley aki. Figura politico conoci di Aruba, Daphne Lejuez, a traves di su pagina di Facebook a expresa, na mas di un ocasion su punto di bista ariba e tema aki.

Lejuez a publica ariba su pagina cu gobierno ta purba di confundi pueblo bisando cu e 30 miyon florin pa aña no lo t’ey, si yega na un acuerdo y firma RAft y cu den e RAft ta para cu e beneficio di interes cu lo tin cu interes abao no lo bay na inversion, pero si no pa paga debe.

E politico ta remarca cu loke gobierno ta keda sin bisa ta cu e beneficio di interes cu nan ta referi na dje ta pa cualkier otro prestamo cu Hulanda inscribi hunto cu Aruba p’e y na unda na e momento aki Aruba ta pagando mas interes. “Lesa e RAft y compronde ta un arte! Pues lo no por usa e bentaha di e diferencia di reduccion di interes sin mas,” el a resalta.

Lejuez a splica cu, segun e RAft ta indica, e beneficio di e reduccion di e tasa di interes pa prestamonan cu Hulanda ta inscribi hunto cu Aruba pa nan, no por wordo usa pa yega na e surplus di 1% di e producto bruto nacional pa cumpli cu e norma manera stipula. Pero lo mester wordo usa pa reduci e capital y interes di e debe prome locual e lo yuda Aruba sali di e debe mas lihe, y no por wordo usa pa ser (mal)gasta.

“Ta tristo cu ta purba manipula informacion y confundi pueblo cu dos cos diferente. Un ta cu lo por scapa 30 miyon tur aña riba e prestamo di covid, (di casi 1 biyon) cu un tasa di interes mas abao, y e otro ta ora cu refinancia otro prestamonan cu lo madura, cu Hulanda lo yuda pa por refinancia esakinan na tasa di interes mas abao. Y ta den e ultimo caso ta unda ta referi cu no por usa e diferencia cu lo scapa na interes pa gasto (inversion), pero pa hustamente yuda reduci e debe mas lihe,” el a subraya den su publicacion.

E politico a splica cu pa loke ta trata e prestamo di covid un tasa di interes mas abao lo pone menos presion riba pueblo pa por alcansa e pagonan di interes.

“E statement haci ta uno manipulativo cu e proposito di confundi pueblo, paso ni con cu bir’e, un tasa di interes mas abao, ta un compromiso y responsabilidad di pago mas abao. Y pa por yega na e surplus di 1% di PBN gobierno lo mester cuminsa actua mas responsabel y reduci su gastonan en bes di aumenta gasto y pasa e cuenta di esaki pa pueblo den forma di mas belasting,” Lejuez a enfatisa.

Pa loke ta trata e inversion, el a indica cu esey den un caso di surplus presupuestario, despues cu alcansa e norma di 1% PBN, loke resta por bay 50%-50% na reduci debe y inversion , “dus un maneho financiero prudente ta importante y necesario!”