Den transcurso di añanan diferente pais na mundo a mira un interes grandi pa locual ta trata hende muhe den politica. Despues di e perdida grandi di Hillary Clinton contra Donald Trump e discusion a sigui. Muhenan, te hasta ora nan ta mas capaz ta perde contra hombernan cu menos potencial.
Aruba mes a marca historia ora Evelyn Wever – Croes a wordo nombra prome minister di pais Aruba. Na Puerto Rico, Alexandra Lugaro a bira e muhe di mas hoben cu a core un campaña pa bira gobernador na e isla. Un editorial di e blog gainesville, ta argumenta cu hende por pensa cu tur feminista ta contento ora tin mas hende muhe den gobernacion. Pero segun e editorial aki e ta mas esencial ainda pa tin hende den gobernacion cu tin como interes bringa pa derechonan di hende muhe. E escritor ta conta cu e no tin sentido pa tene muhenan den oficina cu ta bay en contra cosnan cu feministanan a bringa pa asina largo.
Bay atras
E editorial ta subraya e caso cu a pasa recientemente na Merca unda cu Karen Handel a wordo scogi pa ta miembro di congreso na e state di Georgia. El a bira e prome muhe di e Republican Party pa logra esaki. Mas despues, Sra. Handel a vota encontra di aborto, contra di haci contrapcetivo mas barata y en contra di igualdad den pago. El a encontra su mes cu hopi critica, incluyendo di e revista Cosmopolitan cu a acuse di ta hibando hende muhe mas atras ainda. Mesun cos a conta pa Sarah Palin na 2008, ora cu su ideologianan di ta pro- arma di fuego, pro bida y pro servicio militario a wordo encontra cu hopi critica.
Tanto bal tin mas muhenan den gobernacion cu tin un ideanan opresivo. Si nos kier bringa pa mas igualdad entre hende muhe cu hende homber na mundo, mester tin hende muhenan den politica cu lo para pa otro hende muhe tambe. No esunnan cu ta kiniki ‘si’ na ideologianan cu ya caba ta out dated. E ta bira peligroso ora cu politica cerca un hende muhe ta mas basa riba un agenda secreto cu riba igualdad pa otronan di su mesun sexo.
