Mañan diabierna, corte ta bay tende e sentencia den e caso di corupcion di parlamentario di AVP, Benny Sevinger, conoci como caso Avestruz. E caso aki ta continua un cadena di politico cu a haya nan mes den corte y hasta cera, un cadena cu ainda no a mira su fin.
Caso Avestruz a cuminsa cu un investigacion di Landsrecherche tocante delitonan di corupcion cu posiblemente tuma lugar relaciona cu entrega di tereno di gobierno entre 2009 y 2017.
Den caso Avestruz a investiga e posibel rol di ex-minister Oslyn Benito (Benny)Sevinger y tabata dirigi riba e pregunta si companianan a haya derecho di erfpacht a base incorecto.
Oficialmente e caso a cuminsa na luna di september, pa varios dia e diferente sospechosonan a acudi na corte pa interogacion tocante e fundacion Curason Berde. Aki tabatin seis sospechoso y varios sub-caso:
Elenath y Deshaun, tratando e transaccionnan di tereno reparti na varios luga rond di e isla, y con a usa medionan ilegal pa cierto persona por a adkiri un di e terenonan aki a cambio di algun beneficio; y Damira y Bucuti, tratando labamento di placa y malversacion di fondo.
Fin di aña pasa, tur sospechoso a duna nan declaracion y a presenta pa trata e aspectonan personal.
Asina cu e caso aki ta bay yega su climax mañan, dia 14 di april, unda ta bay dicta sentencia contra Sevinger.
Sinembargo, e caso aki ta apenas un link den un cadena di corupcion afectando politica di Aruba. Ademas di Sevinger tin e condena di ex-minister Paul Croes, e acusacionnan involucrando Eddie Briessen, e caso contra ex-minister Guillfred Besaril, e condena contra Alan Howell – ken ainda ta bay apela su sentencia. Tambe tin acusacionnan – no confirma pa Ministerio Publico – contra parlamentario Marisol Lopez Tromp y e caso Kukwisa. Esakinan ta apenas algun di e acusacionnan cu a sali na luz relaciona cu corupcion den politica di Aruba. E pregunta ta keda, ken ta bay ta e siguiente den e lista di politico cera?
Lesa mas tocante e tema aki den nos Editorial riba pagina 5.
