Awe pa 10or presidentenan di sindicato di gobierno lo reuni pa entre otro trata asunto di indexering. Maske gobierno ta bisa cu pa falta di fondo no lo duna indexering, sindicato ta insisti cu su miembronan no ta acepta esaki. Ademas lo trata malcontento cu ta reinando bou empleadonan.
Ayera a tuma luga un conferencia na unda Presidente di Sindicato di Polis Aruba (SPA), Jose Dirks a bisa cu nan a trata e problema cu tin cu e asistencia militar, cual tambe ta un topico cayente, pero cu a yega na un acuerdo riba dje. Aki e miembronan a bisa cu nan por biba cu esaki, pero cu esaki mester cay bou di supervision di Alto Comisario di Cuerpo Policial Aruba (KPA), pa asina mantene un bon bista general di kico ta pasando riba nos isla.
Indexering
Durante e ultimo reunion cu tur sindicato tabatin cu gobierno dialuna ultimo, SPA a bin compronde cu gobierno no tin placa y cu no lo bay duna indexering. Dirks ta bisa cu a hiba e informacion aki na nan miembronan y nan no ta acepta esaki. E motibo ta cu, mirando den historia di indexering, tur gobierno a bisa cu no tin placa, y na final di dia toch nan a logra pa haya indexering.
E ta sigui splica cu coleganan no ta bay acepta cu gobierno ta djis bisa cu no tin placa y cu mester bin cu un solucion, pa motibo di esaki, awe 10or tur presidente di sindicato di gobierno lo reuni pa wak kico lo ta e siguiente stap. Ta asina cu tur sindicato a haya instruccion pa bay na nan miembronan pa asina wak kico nan ta pensa y kico lo ta e siguiente stap.
Indexering ta djis un di e puntonan cu SPA kier trece pa dilanti ya cu tin varios asunto cu ta preocupa e sindicato di cuerpo policial, entre otro stabilidad di cuerpo di mando, ekiponan adecua.
