Diariamente polisnan ta haya nan mes confronta cu problemanan di violencia domestico. Teniendo cuenta cu esaki, Cuerpo Policial Aruba a participa na un seminario relaciona cu violencia domestico.
Despues di e seminario, Vanessa Tjon, Comisario di Polis a conta cu parti di e trabou regular di polis, violencia domestico, maltrato y problema di pareha ta aparece diariamente. Por lo tanto ta importante pa polisnan ta bon prepara, entrena y orienta cu e problema aki, pa por intermedia den e casonan aki y consecuentemente persigui e sospechosonan.
Tjon ta masha contento cu e asistencia grandi na e seminario y ta convenci cu asina so por conscientisa polisnan di e problema aki den nos comunidad. “E ta algo hopi sensitivo. Hopi biaha comunidad ta critica Polis cu nan no ta cla pa atende cu casonan asina, mirando cu hopi biaha e victimanan ta spera mas y miho servicio, mas gevoel, mas ayudo, mas sosten, mas comprension di Polis pa nan caso”, asina Comisario Tjon a splica.
E intencion ta, dor di tipo di seminarionan asina, pa comparti formulanan cu e Polisnan pa brinda mas y miho servicio na e victimanan, ta mas pendiente di nan caso y purba maneha entre e trauma cu e persona a keda atras cu ne y e caso penal andando contra su agresor. Polis t’ey pa percura pa orden publico y pa conduci investigacionnan penal. Pero e ultimo añanan, mas y mas ta spera sosten social for di Polisnan. Na Scol pa Polis ta prepara hobennan tambe pa e forma nobo aki di haci trabou di Polis, pero ta importante pa cada pasa tanto tempo bolbe elabora riba e tema aki, cu informacion actualisa y cu metodonan nobo con atende na momento di un caso di violencia domestico.
