Polisnan cu proyecto pa ruim op autonan bieu

Bao guia di Scol pa Polis, un grupo di Agent Eerste Klasse durante di nan stage di shete siman ta trahando duro pa ruim op mas tanto “autowrak” posibel. Un “autowrak” ta un auto bieu y/of kibra cu ta para pa algun tempo. E doñonan mes hopi biaha no sa kico pa haci cu nan, pero entretanto e structura ta forma problemanan pa medio ambiente y frecuentemente ta afecta. E team trahando riba e proyecto aki ta consisti di Javier Gonzalez, Joshua Kelkboom, Kendrick Werleman y Chari Maduro. E lider di e grupo ta Elvis Perez. E agentenan a logra haya Papito Towing pa asisti nan cu e transportacion di e autonan. E autonan ta wordo hiba pa Daltra, cual ta e unico compania cu tin actividadnan pa recicla auto na Aruba. Tur e servicionan aki ta gratis pa e ciudadano, danki na e coordinacion di parti di Cuerpo Policial y colaboracion di parti di e companianan envolvi. E team di Polisnan hoben a dicidi cu nan proyecto pa no concentra riba un area so, pero pa tuma ful Aruba como nan teritorio, como cu autonan bieu y/of kibra para banda di caminda of riba un tereno por bira criadero pa sangura y otro insecto y bestianan no desea, cu por transmiti malesa y/of causa hopi molester. E ta un situacion malo tanto pa medio ambiente y naturalesa, como pa e ser humano. Nan meta ta pa conscientisa comunidad cu tin alternativanan pa deshaci di “autowrakken” y promove miho salud y miho ambiente den barionan rond Aruba.

Comunicado KPA