Cinco animal salvahe a duna bonbini na funcionario di fiscalia Mexicano, ora cu nan tabata haci un entrada hudicial na un cas situa na un zona exclusivo di Ciudad Juarez na estado Chihuahua – Mexico.
E confiscacion aki ta e di tres hallazgo di animal salvahe, cu polis di Mexico y autoridad ambiental a haya den ultimo 10 dia.
Dia 14 di Augustus, na estado di Oaxaca, polis a haya animal exotico na un cas propiedad di un lider di un grupo di delincuente conoci como ‘Los Rojos’. Durante e inspeccion e grupo di investigador a haya cabay, tucan, pushi montes, pauwis, valk, patrishi, lamchi, y toro brabo y otro bestia mas.
Na e entrada hudicial cu a tuma lugar durante fin di siman cu a pasa na Ciudad Juarez, procuraduria ambiental y fiscalia di Mexico a emiti un rapport, cu ta indica cu nan a haya tres tiger, un cocodrilo y un leon chikito.
E bestianan a ser confisca pa delito ambiental, cu a ser cometi pa supuesto doñonan, sin embargo fiscalia ta prepara un investigacion, pa asina haya sa e procedencia di tur e bestianan y haya sa tambe e actividadnan cu e doño di e cas tabata haci. Te awor fiscalia no tin ningun persona deteni.
E cas tabata bashi, y awor a keda a cera.
Otro procedimento a tuma lugar na municipio San Pedro Garza García, Nuevo León caminda Procuraduria Ambiental a sigura hopi bestia di e especie miho conoci como ‘papio hamadryas’ of ‘papión sagrado’. Entrada hudicial a tuma lugar despues cu polis a haya un yamada anonimo, cu tabata denuncia cu e macaconan tabata den un cura y den condicion di salud hopi malo.
“Doñonan di e bestianan aki no tabatin ningun documento cu por a certifica e propiedad di nan di e bestianan, ora cu autoridad a verifica e situacion huridico di e macaconan. E doñonan no tabatin chip y tampoco un plan di maneho,” autoridad ambiental a sigura den un comunicado.
Ley General di bida silvestre na Mexico ta sanciona e maltrato y propiedad ilegal di animal salvahe, cu hopi multa y e confiscacion definitivo di e bestianan, cu generalmente lo ser hiba na un zoologico of parke natural.
