Manera a keda conoci, 17 october 2021 polis a haya un melding di un persona cu a cay desde parkinglot di e mall Paseo Herencia unda cu Luisangel Figueroa Flores di 20 aña a resulta mortalmente herida. Ayera atardi Ministerio Publico (OM) a manda un comunicado di prensa unda nan a informa cu Recherche a cera e investigacion di e caso aki.
“Ministerio Publico a tuma e decision pa no duna ordo pa mas investigacion y a cera e dossier. Famia di e fayecido a wordo poni na haltura di e decision aki den un conversacion personal”, e comunicado a detaya.
Ministerio Publico a yega na e conclusion despues di e investigacion cu e caso aki ta trata di un accidente unilateral hopi lamentabel. No tin ningun indicacion cu lo tin otro persona of personanan envolvi. Investigacion di pistanan na e sitio y investigacion di telefon di e fayecido no ta duna ningun indicacion cu un crimen lo por a tuma luga. Detayenan di e investigacion aki a wordo papia cu e famia y Ministerio Publico ta di opinion cu considerando privacidad di e fayecido, no ta na su luga pa bisa mas tocante e detayenan aki.
Di su parti, Anahiza Flores, mama di Luisangel despues di anuncio di Ministerio Publico a keda basta afecta unda cu den un declaracion riba e website 24ora a señala cu e no ta contento cu e conclusion di Ministerio Publico.
Ademas di esey, el a trece cu aunke su yiu tabatin 20 aña e no tabata un mucha pero tampoco tabata un homber, e tabata un persona hopi respetuoso, bon mucha cu tabata studia y traha como DJ, “algo cu mi a apoya di mi yiu semper, unico cos cu e tabata kier ta pa e traha como DJ”, el a finalisa.
