Autoridad di Turkia a declara di a logra pone man riba un di e criminalnan mas busca pa traficacion di hende. E homber Irakes Akbar Omar Tawfeeg lo tabata opera un red di traficacion di hende for di e parti nort di Iraq pa paisnan manera entre otro Grecia, Spaña, Italia y otro paisnan Europeo. Cu e red aki, Tawfeeg tabata enrikece su mes cu miyones di euro pa luna.
Segun informacion cu a wordo duna door di autoridad Turco, pa medio di e red aki lo trafica miles di persona di forma ilegal pa otro paisnan. Durante su aresto, a haya Tawfeeg cu un paspoort falso di Republica Domincana. Esaki ta haci cu Ministerio Publico di Turkia ta pensa cu Tawfeeg lo tabata tin intencion di expande su red criminal den direccion di Latino America.
E aresto mes a tuma luga riba un barco durante un accion policial grandi contra di e red di Tawfeeg. Hunto cu ne a aresta un otro 20 persona mas. Adicional a yama aden casi 600 persona cu di un of otro forma lo tabata tin e intecion di imigra di forma ilegal, uzando servicionan di Tawfeeg.
Segun cifranan di Nacionnan Uni, pa aña tin un promedio di 26 mil persona cu ta haci uza si imigracion ilegal dentro di Europa, di cual alrededor di 500 persona no ta logra yega nan destinacion na bida.
