Dianan aki nos por a mira den diferente incidentenan cu a sucede cu ora prensa ta haciendo su trabou pa informa comunidad di kico ta pasando, algun funcionario di cuerpo di polis a stroba e trabou periodistico na un manera violento, abusando di e poder cu comunidad a confia na nan.

Un di e prome incidentenan a sucede dia 13 di mei ultimo, na unda un reportero a wordo stroba den su trabou pa motibo cu e tabata graba un cas cu tabata na candela. Diasabra ultimo 23 di mei un reportero di e website Awe24 tabata informa di e accidente na Sero Pita, den e cual lamentablemente dos persona a fayece; y otro tabata diadomingo ultimo 24 di mei, na unda agentenan di polis tabata haci un detencion na Paradera. Den esaki, igualmente dos reportero di diferente website a wordo stroba cu flashlight den nan camara pa nan no documenta e suceso.

Den e situacion aki di detencion na Paradera, segun un publicacion di e website 24ora.com e mama di e sospechoso cu tabata siendo deteni tabata documentando cu su telefon personal e detencion di su yiu, cual no ta contra ley. Un polis femenino a duna dos orden specifico na e señora y a bisa ‘hala patras, y stop di graba tambe’.

Un par di minuut despues den e mesun incidente, por a mira otro detencion cu a tuma luga na unda e mesun señora tabata grabando y e mesun polis femenino, en bes di scoge pa hala e señora for di e situacion, a ranca su telefon y a core bay cune. E acto aki ta hinca duda den integridad di e polis femenino en cuestion y ta un acto contra ley, sin hustificacion valido na e momento ey. Simplemente e no tabata kier pa graba e situacion.

Durante un conferencia di prensa, Bon Dia Aruba a puntra minister di Husticia, Andin Bikker si esaki ta e maneho nobo di Cuerpo Policial pa e crisis aki, esta cu ta trata di stroba prensa pa haci su trabou. Ademas si comunidad por confia 100% den polis ora nan ta traha un rapport. Pa esaki Bikker a contesta: “Mi no ta al tanto cu polis a purba di stroba ningun trabou di ningun reportero y esey tampoco ta e intencion. Y ademas ora polis ta traha un rapport bou huramento, esey ta segun su conclusion.”

Ta necesario pa recorda pa Cuerpo Policial di Aruba cu UNESCO ta bisa cu libertad di prensa ta importante, pa motibo cu nan ta hunga un rol vital den informa e ciudadanonan riba asuntonan publico y monitoria accionnan di gobiernonan den tur nivel. Tambe mester respeta e articulo 19 di Declaracion Universal di Derechonan Humano, na unda cu Hulanda tambe a ratifica e tratado aki.

Bon Dia Aruba a haci un entrevista cu un hurista, ken lo keda anonimo. A puntr’e cierto preguntanan specifico di libertad di prensa y no solamente el a duna su pensamento, sino cu el a sostene cu sentencianan di hues di corte di prome instancia na Aruba y sentencianan di corte di casacion na Hulanda.

Esaki ta un di e hopi casonan specifico di Aruba – cu ta zaaknummer 52 van 2017 – e cual ta existi un sentencia di un polis cu a abusa sexualmente di un persona cu status no legal den un auto di polis. Tambe el a abusa di su poder como un funcionario policial y su declaracion no tabata cuadra cu e berdad. E polis en cuestion a wordo sentencia 4 aña di prizon.

Den e sentencia di hues ta declara cu un funcionario di polis tin autoridad cu un ciudadano no tin, e cual ta trece cune e oportunidad di haci un impacto riba e libertad di otro personanan. Pa e motibo aki, ta spera di un polis un nivel di integridad completo y intachabel. E tin un funcion ehemplar y ciudadanonan tin cu sinti nan mes sigur cu e presencia di polis, cu e polis no ta bay abusa di e autoridad cu ta wordo confia na dje.

Semper e declaracion di polis ta keda unilateral y pa e motibo aki, e trabou di prensa ta hopi esencial, pa trece e otro banda di e berdad, a base di documentacion y/of pruebanan.

Den otro caso na unda mester bisa pakico ta importante pa graba un suceso, un ehemplo ta e caso di Mitch Henriquez, cu henter Aruba a keda conmovi cu su caso. Na momento cu e tabata cu vakantie na Hulanda, polisnan Hulandes a detene y na base di detencion na e sitio e persona aki a fayece. Despues e berdad a sali na momento cu un ciudadano a mustra cu el a graba cu su telefon personal loke a sucede. Esaki a pone den duda e integridad di cuerpo policial, na unda nan a pone den nan rapport nan declaracion y e grabacion a mustra otro contexto di e historia. Den esaki, Ministerio Publico Hulandes no tabata na altura di e video cu a cambia e caso totalmente.

Na Merca, tambe actualmente tin un caso cu a hala atencion internacionalmente, na unda tin e mesun scenario cu e caso di Mitch Henriquez, caminda polis ta haci abuso di e autoridad confia na nan y a causa e morto di un ciudadano. Si no ta pa e grabacion di un ciudadano atento, e polis aki lo a sali ileso for di e situacion, na unda nan a declara den e rapport cu e persona a bira malo durante e detencion y imagennan di grabacion a mustra otro situacion.