Un video ta mustra varios efectivo di polis di Brasil na momento cu nan tabata tira riba manifestantenan durante protesta violento contra gobierno di Michel Temer, cu a tuma lugar na Brasilia. E video cu a ser transmiti pa corant O Globo, ta mustra un grupo di polis bringando contra manifestantenan, riba un caya cu ta cerca di hopi oficina di gobierno, ministerionan y congreso di Brasil.
Den un momento di e video aki, por mira un polis cu ta core den direccion di un grupo di persona cu tabata lansa obheto contra oficial di polis. E polis a tira cinco impacto cu arma di candela den laira y despues den direccion di persona cu tabata manifesta eynan.
Despues di e tiramento, otro polis cu no tabatin jacket anti-bala a core den direccion di manifestantenan cu arma di candela den man y a tira riba manifestantenan. Despues nan a duna un orden pa cu tur agente hala patras.
Algun tempo despues hende a cuminsa grita cu un homber tabata herida. E camara di medio di comunicacion O globo a mustra un homber riba suelo, tur na sanger y cu hopi persona den su alrededor.
Diaranson gobierno di Brasil a sigura cu e decreto di presidente Michel Temer cu ta autorisa presencia di forsa arma riba caya di distrito federal lo ser revoca na momento cu restablece orden, despues di tur incidente cu a tuma lugar diaranson ultimo.
Raul Jungmann, minister di defensa a splica cu presidente Temer a autorisa presencia di forsa arma riba caya di Brasilia te proximo 31 di mei despues di violento protesta pa asina exigi renuncia di e presidente, cu a laga un saldo di 49 herido y 7 persona deteni.
Despues di e situacion, cerca di 1300 militar di ehercito y 200 militar experto den maneho di fusil di armada di Brasil a ser distribui pa cubri caya di distrito federal, pa cuida y mantene orden publico na Brasilia.
Segun polis militar, den e manifestacion a participa entre 35 mil pa 40 mil persona, cu a marcha pacificamente te sede di congreso, caminda a cuminsa varios suceso den un recorido di 2 kilometer riba e avenida unda edificio di ministerio di gobierno ta situa.
Meymey di tur desorden, ministerio di agricultura a ser ataca cu bom molotov cu a provoca un incendio na un entrada di e lugar ey, y cu despues a ser paga pa cuerpo di bombero, cu a responde lihe na e situacion di emergencia. Mientras tanto un cantidad di enfrentamento tabata continua.
Tambe den e enfrentamentonan a ser ataca ministerio di finanzas, cultura, turismo, energia y mina, y riba e avenida hopi manifestante a cende candela den container di sushi y otro obheto.
Temer ta centro di un polemica desde siman cu a pasa, pa motibo di un serie di confesion di banda di directiva di grupo JBS, kendenan ta relaciona directamente cu e situacion di supuesto corupcion, pa cual motibo corte supremo a aproba un investigacion.
Temer a perde den ultimo siman e apoyo di hopi sector di su propio base parlamentario. Na momento di tur e manifestacionnan presidente di Brasil tabata reuni cu legisladornan di diferente partido na palacio presidencial di Planalto.
