“Tin mas keho denuncia riba red social cu tin den nos sistema y esey ta preocupante. Pa dos motibo, pasobra asina nos no por investiga pa yega na e sospechosonan y tampoco nos por confirma si berdad un semehante delito a tuma luga”, asina Alto Comisario di Polis Dolfi Richardson a duna di conoce.
Esaki ta informacion di e relato cu polis a manda pa prensa:
“Mi ta urgi comunidad pa asina nan tuma nota di un iregularidad of nan bira victima di cualkier acto criminal, pa yama Polis mesora.”
E reaccion di e hefe di Polis ta bini despues di tuma nota di un avalancha di kehonan publica riba red social, of te hasta cu ta mandando via sistema di celular, pero cu Polis mes no ta na altura di dje. Ta sali for di e punto di bista cu e hecho nan ta berdad, pero ningun hende a bini afo y bisa cu el a bira victima. Semper ta lesa cu ta yiu di colega, un famia of un conoci a bira victima. Casi e ta mustra un strategia pa purba sembra panico y miedo innecesario den comunidad.
Cuerpo Policial ta urgi ciudadanonan, pa yama 100 asina cu algo asina sosode cu nan, sea Bo a bira victima di un caso di hortamento, atraco of cualkier delito. Tambe ora nota movecionnan straño of sospechoso, tur informacion ta yuda.
Di otro banda, Polis ta consciente cu tin un aumento den casonan di ladronicia den comunidad. Pa esey, hunto cu Ministerio Publico, ta hibando un maneho riguroso pa persigui tur e gruponan cu ta haci nan mes culpabel na e tipo di “economia facil”. Di otro banda, Mando Policial a percura pa creacion di varios ekipo adicional di Polis pa aumenta presencia riba caya, manera ta Polisnan patruyando den barionan, Flex Team, K9 Team, Mobiele Eenheid, Arrestatie Team y otronan cu ta patruyando diariamente na luganan strategico unda ta conoci cu tin sospechosonan ta frecuenta. Na tur tin 600 Polis trahando 24 ora pa dia pa garantisa proteccion na comunidad.
E ekipo di recherchenan cu ta investiga casonan di atraco, e asina yama “Atraco Team” ta ekipa cu hopi experencia, capaz pa investiga e casonan mas complica y dificil. Aruba orguyosamente tin un di e indice di solucion di casonan criminal di mas halto den henter e region Caribense, segun Cuerpo Policial
“Pero nos enfoke ta mas riba prevencion. Cada caso riba su mes ta di mas y ta nos intencion pa haci tur lo posibel, den e limite presupuestario cu nos tin, pa garantisa proteccion na comunidad y preveni delitonan asina”, di acuerdo cu Alto Comisario Richardson. El a subraya na final, pidiendo cooperacion di pueblo pa informa Polis di movecionnan straño, raporta casonan di atraco mesora, pasobra mas lihe Polis yega, mas chens tin cu ta gara e ladronnan.
“Corda cu si bo yama Polis y denuncia e caso, tin chens grandi cu nos ta gara e ladronnan. Pero si Bo keda sin yama y sin haci denuncia, bo por ta sigur cu lo no gara e ladronnan y nan lo sigui comete mas crimen y kisas ripiti e mesun acto criminal cu bo mes”.
Un di e personanan cu a menciona un intento di atraco riba caya ayera y a publica esaki riba Facebook sin supuestamente a denuncia esaki na polis, ta Ishwar Daryanani. Su post a bay viral y hende hasta a haya den un viral Whatsapp message di hende desconoci. Daryanani hasta a haya reaccion riba Facebook di minister di Husticia Arthur Dower puntrando si el a wak e number di autonan y si Daryanani a entrega un keho na polis. Daryanani mes tambe a comenta riba locual e Alto Comisario a declara:
“Korpschef a raporta cu nan departamento di Facebook ta raporta mas hopi atraco cu nan departamento di telefoon cu ta 100 of 911. Cual esey so ta valido aparantemente.
Facebook tin nomber y fam di e persona cu ta raporta y asta location. Pero yama 100 of 911 ta anonymous y no tin location tin mas credibilidad cu Facebook.”
“Dus ora ma yama 100 no tin hende pa contesta y despues e lista di prengunta cu mester contesta pa despues bo tende nos ta manda patruya.
Social media ta mescos cu neighbour watch. Tur hende ta alerta tur hende mes ora. No despues di 48ora cu ya tur hende ta affecta caba.
Pero si tin tempo pa keda riba facebook y compara cu tin mas raportahe riba facebook cu yamada. Awel si!”, asina Daryanani ta comenta.
Bon Dia Aruba kier remarca cu nos tambe ta ripara cu hende no tur ora ta entrega keho. Un di e motibonan ta cu nan no sa cu por bay polis. Por ehemplo den caso di sushedad riba tereno, hasta tereno di ‘eigendom’, por entrega keho si esaki ta causa molester.
Di otro banda Bon Dia Aruba sa di varios casonan unda ciudadanonan kier haci un denuncia sinembargo polis no kier tum’e. Esaki mas tanto ta sosode den dianan di weekend. Nan ta haya contestanan manera ‘no tin un recherche pa tuma e keho’. Pero esaki no ta permiti: polis semper mester tuma keho di un ciudadano.
