Polis investigando e asesinato di abogado di Amsterdam, Derk Wiersum, a revela un potret di un van blanco, cual nan ta kere tabata e vehiculo uza pa e asesinonan huy.
E van, cual ta pensa ta un Fiat Doblo, a ser mira coriendo for di Imstenrade den districto di Buitenveldert di e capital, alrededor di e tempo cu Wiersum a ser tira mata na su porta di cas, e mainta di dia 18 di september ultimo.
Wiersum, di 44 aña di edad, tabata actuando pa Nabil B, un testigo clave den un huicio mayor di droga, cu ta centra riba e gangster Ridouan Taghi, kende ta den fuga. E asesinato ta describi como un ‘fase nobo scur’ di un guera cada bes mas mortal den mundo baho di droga, y cu a incita Minister di Husticia, Ferd Grapperhaus, pa priminti medidanan nobo, mas fuerte contra criminalnan.
Polis a bisa cu ta inusual cu nan no a recupera un vehiculo bandona of kima ainda, cu ta match e descripcion di e van. Ademas nan a bisa cu tabata buscando dos homber en conexion cu asesinato di Wiersum, na luga di un asesino solitario manera nan a indica anteriormente.
Ta describi esun cu a tira cu arma di candela como edad 20 pa 25 aña. Servicio di Ministerio Publico tambe a reforsa siguridad riba tur persona involucra den caso Taghi.
