Polis ta investigando varios morto sospechoso na cas di cuido

(NLTimes) – Polis ta investigando varios morto sospechoso na e cas di cuido Cleijenborch den Zeeland cu a tuma luga entre 2019 y 2023. E investigacion di escala grandi ta enfoca riba si un empleado a hunga un rol den e fayecimento di e clientenan aki, PZC a reporta basa riba su propio investigacion.

Polis a lansa e investigacion prome cu zomer. Investigadornan a cuestiona empleadonan extensamente y ex-empleadonan di Cleijenborch den simannan recien. Segun PZC, Cleijenborch su empleadonan a ripara cu un colega tabata remarcablemente varios biaha e ultimo persona presente prome cu residentenan a fayece den un departamento unda hende di edad avansa cu demencia ta biba. Empleadonan a papia di nan sospecha entre nan mes y e señalnan eventualmente a yega maneho. E maneho di Cleijenborch a suspende e empleado en cuestion na maart y a pidi un agencia externo conduci un investigacion di integridad contra e empleado y a informa tambe Inspectorado di Salud y Hubentud.

Resultado di e investigacion inicial a causa cu Cleijenborch a reporta nan sospecha na polis. Polis awo ta investigando si e dunado di cuido en cuestion tabatin un rol den varios morto. E empleado te ainda no a ser designa como sospechoso y no a ser deteni tampoco.

Polis y Ministerio Publico (OM) a confirma e investigacion na PZC pero no kier a duna mas comentario. “Polis su investigacion ta mas tanto dirigi na determina si ofensa criminal a keda cometi y si por conecta un sospechoso na nan. Si esaki ta e caso, y ofensanan criminal a keda cometi, e investigacion lo continua. Si no, esaki lo ser cera,” vocero di polis a declara.

Jolanda Meijer, director di Stichting Ouderenzorg Noord-beveland, cual ta inclui Cleijenborch, tampoco no kier a duna e corant mas detaye. “Hopi investigacion ta andando te ainda. Mi no ta permiti pa y no por provee mas informacion. Claramente, mi ta realisa cu esaki ta trece dilanti varios pregunta. Pero mi lo por provee mas informacion ora cu esaki bira posibel.” Cleijenborch a informa su empleado, cliente y nan miembronan di famia di e situacion.

Mas o menos 80 ciudadano ta biba na Cleijenborch. Nan tin demencia of incapacidadnan fisico. E institucion tambe ta provee cuido y ayudo domestico pa personanan cu ta biba na cas. Nan facilidad ta duna cuido na mas o menos 130 persona.