(AP) — Polis bisti den riot gear a cuminsa saca activistanan di clima ayera for di un pueblo condena den occidente di Alemania, cual ta programa pa demolicion pa haci espacio pa expansion di un mina di carbon.
A tira algun piedra y klapchi mientras e agentenan tabata drenta e pueblo chikito di Luetzerath, cual a bira un punto crucial den e debate tocante e esfuersonan climatico na e pais, ayera mainta.
Vocero di polis, Andreas Mueller a bisa cu e atakenan contra agentenan “no tabata nice” pero a nota cu mayoria di e protesta tabata pacifico. El a bisa cu polis lo continua cu su tactica di purba di evita cualkier escalacion door di ofrece pa permiti cualkier activista cu bay riba su mes pa hacie sin mas medida di parti di polis.
Asina mes, algun manifestante a keho di forsa innecesario di polis y otronan a bisa cu e escala di respuesta policial – cu oficialnan yegando for di henter e pais cu cañon di awa riba standby – tabata riba su mes un escalacion no hustifica pa e protesta pacifico. Al menos un muhe a grita den aparente dolor mientras agentenan a usa forsa pa retir’e di un blokeo pafo di e pueblo.
Pa ayera tardi, decenas di activista tabata campa na Luetzerath, algun den casnan di palo elabora, mientras polis poco poco a move door di e pueblo retirando baricada y un cushina comunal. Algun activista a lesa buki of tabata toca acordion riba tripod di tres meter di haltura. Algun a sinta of para riba dak di e edificionan restante na Luetzerath a pesar di e biento friu.
Ambientalistanan ta bisa cu bulldoze e pueblo pa expande e mina di carbon cercano, Garzweiler, lo resultad den cantidadnan enorme di emision di gasnan di invernadero. Gobierno y compania di utilities RWE ta argumenta cu e carbon ta necesario pa sigura siguridad energetico di Alemania.
Sinembargo, un estudio di Instituto Aleman pa Investigacion Economico ta cuestiona e posicion di gobierno. Su autornan a haya otro camponan di carbon existente cu por usa na su lugar, maske e gastonan pa RWE lo ta mas grandi. E estudio a haya cu otro alternativa lo ta pa Alemania aumenta produccion di energia renobable, reduci demanda door di medidanan di eficiencia energetico, of importa mas carbon of gas di exterior, segun e estudio.
Citando e estudio y e necesidad urgente pa reduci emision di carbon, manifestantenan a nenga di cumpli cu un orden di corte dialuna cu efectivamente a prohibi nan presencia den e area. Algun activista a expresa rabia en particular contra e partido ambientalista Berde, cual ta parti di gobiernonan regional y nacional cu a yega na un acuerdo cu RWE aña pasa permitiendo e pa destrui e pueblo a cambio di caba cu uso di carbon na 2030 na lugar di 2038. Vice-canciyer Robert Habeck, minister di economia y clima di partido Berde, a defende e acuerdo como “un bon decision pa proteccion di clima” cu ta cumpli cu mayoria di demanda ambientalista y ta scapa cinco otro pueblo di demolicion.
Cabesantenan di varios organisacion ambiental tabatin plan pa bishita Luetzerath awe pa expresa solidaridad cu e activistanan eynan. Tambe tabatin un protesta programa cerca di e lugar diasabra, cu presencia di activista prominente Sueco, Greta Thunberg.
