Personanan abordo mester a come pisca curu pa par di dia

Awe 7 januari 2018 pa mas o menos 8 am Central di Polis ta yama polis maritimo cu un boto Venezolano mester a yega Boca Cathalina. Patruya di strandpolitie a yega e sitio hunto cu polis maritimo, segun un informe di Cuerpo Policial.

Na yegada di patruya en berdad ta topa un boto. Ta trata di e boto registracion AQYM 2498 “Las Gemelas”. Polis maritimo a cuminsa cu nan investigation despues di a yega na e sitio.

A resulta cu dia 4 di januari 2018 e boto menciona a sali di Venezuela di waf “Tocopero” cu 2 persona na bordo pa bay pisca. Nan a bai pisca den vecindario di penisula di Paraguana. Nan a haya problema cu motor y drief mas leu cu peninsula di Paraguana.

Nan purba haci señal cu nan cuchiu pa tera pero sin resultado. Djey nan a sigui drief bin direccion noord. Nan a keda drief 3 dia riba laman, asina cuerpo policial ta informa. Nan tabatin awa so na bordo, pues nan no tabatin cuminda.

Sinembargo nan a tira reda den awa di Venezuela nan tawata tin algun pisca na bordo y asina a cuminsa come pisca curu. Stroming a hiba nan te trece nan algun miya pabao(west) di Aruba. Despues di a mira tera nan a keda purba start motor y a logra tambe net pa trece nan serca di tera na altura di Boca Cathalina.

Pa mas o menos 0600 am awe mainta nan a yega Boca Cathalina. Un di nan a bula na awa bai tera pa busca ayudo. Boto di polis BP 2 a acerca y a tuma e persona nan over y asina sleep nan boto direction waf di Barcadera.

Personal di immigracion a klaar in e personanan. Via caminda nan oficial por a saka afo cu enberdad Venezuela a manda un aviso cu e 2 personanan aki ta perdi riba laman. Mirando cu nan tabata cansa y sin come bon e ultimo dianan Rode Kruis a tuma nan over pa asina mayan mainta nan traha riba nan boto pa nan por sigui bek direction Venezuela. Maritiem polis a yuda nan cu spark plug y fuel pa nan boto. Asina pa nan por jega bek Venezuela sano y salvo.

Tin di aplaudi cu Cuerpo Policial y partnernan manera Rode Kruis cu ta yuda esnan cu ta haya nan mes den situacion dificil, no obstante nacionalidad ni situacion actual cu ta reina na nos pais bisiña.