Polis Hulandes a suspende cuatro sospechoso ayera despues di locual ta sospecha di ta un intento fracasa pa saca un of mas prizonero for di un prizon, segun autoridadnan.
No tabatin reporte di herido, y polis a bisa cu ningun prizonero a huy di e prizon den ciudad oriental di Zutphen, cerca di frontera cu Alemania.
Segun polis, varios persona a purba di forsa drenta den e prizon. Polis a nenga di duna comentario riba ken nan por tabata purbando di yuda huy.
Noticiero NOS a comenta cu probablemente e incidente ta relaciona cu e criminal Omar L., kende ayera a ser traslada na e prizon di siguridad halto na Vugt, segun su abogado Sander Janssen. Den e prizon en cuestion ta sinta entre otro Ridouan Taghi y Willem Holleeder.
“Ta parce como un intento di un kiebre organisa”, polis a bisa den un declaracion.
Polis a bisa cu inicialmente a yama nan na e escena mainta laat, despues di reportahenan di un van kimando riba tereno di e prizon. Imagen di video di e escena a mustra un van blanco siendo retira di e hekinan di e prizon, cu ta parce destrui pa candela.
