(NLTimes) – Polis di Amsterdam a emiti un advertencia severo despues cu varios hoben den e ciudad y areanan rond a bira victima di extorsion digital via plataformanan di medionan social den e ultimo simannan. Autoridadnan ta urgi esnan afecta pa raporta e crimennan a pesar di cualkier miedo di represalia.

E metodo di extorsion tabata dirigi principalmente riba menornan di edad riba Snapchat, caminda criminalnan a imita figuranan di autoridad y a exigi pagonan. Victimanan a ser bisa falsamente cu nan debe boet pa ta “un molester” pa otronan. Si e hobennan no paga algun shen di euro, nan tabata ser menasa cu represalia violento, incluyendo ser filma mientras nan tabata kita nan paña of agredi fisicamente.

Polis no a confirma ainda e cantidad exacto di incidentenan raporta pero a haci un yamada na cualkier otro victima di extorsion pa bin dilanti. “Hasta si bo tin miedo y ta insigur, nos kier tende di bo toch pa nos por explora opcionnan hunto,” polis a bisa den un declaracion comparti riba nan cuenta di Instagram.

E advertencia di polis ta sigui un preocupacion creciente tocante e uso di Snapchat como un plataforma pa extorsion placa for di hobennan vulnerabel. Snapchat a keda bou di control mundialmente pa su rol den facilita crimennan asina, specialmente na Merca, caminda e app a ricibi miles di informe di intentonan di extorsion similar cu ta encera menornan di edad.

Na 2022 so, Snap Inc., e compania mama di Snapchat, a ricibi aproximadamente 10 mil informe di extorsion cu ta dirigi riba hobennan. Sinembargo, e compania a ser critica pa su contesta, ya cu el a scoge pa no interveni den hopi caso debi na e gastonan halto di implementa medidanan di seguridad adecua. A pesar di esaki, Snapchat ta sostene cu e ta “continuamente mehora” e seguridad di su app, segun un declaracion na cuminsamento di e aña aki.

Den luz di e preocupacionnan aki, polis di Amsterdam ta urgi hoben- y mayornan pa keda vigilante y denuncia cualkier actividad sospechoso. Autoridadnan a enfatisa cu e funcion di anonimidad di Snapchat hopi biaha ta encurasha criminalnan pa probecha di menornan inocente, haciendo dificil pa agentenan di ley busca e criminalnan.

Banda di extorsion, un otro crimen preocupante a surgi anteriormente cu ta encera atraco digital. Den e casonan aki, sospechosonan a obliga victimanan pa manda placa via sistemanan di pago mobil manera Tikkie, un app popular di pago instantaneo Hulandes. Polis ta informa cu seis incidente a ser documenta, tur a sucede principalmente na Oud-Zuid di Amsterdam