polis informacion violencia domestico (1) (1).jpg

– No ta cuestion cu e casonan di violencia domestico caminda polis ta duna asistencia a baha, sino cu cuerpo di polis ta abstene di divulga e tipo di informacion aki pa pueblo.

 

Nan argumento ta cu caso di violencia domestico ta un echo caminda lamentablemente no solamente e agresor, sino hendenan vulnerabel manera e victima mes of nan yiunan menor di edad, ta keda exponi publicamente tambe.

 

John Larmonie  di cuerpo di polis  ta bisa cu berdaderamente e caso di violencia domestico no a disminui, sino cu ultimo tempo nan no ta mas den publicidad manera antes. Cuerpo di polis  a dicidi di no divulga mas e echonan relaciona cu violencia domestico caminda polis ta brinda asistencia. E echonan cu a tuma luga recientemente, y cu a sali den luz publico, ta esunnan cu prensa mes ta bin cu ne. Sr. Larmonie kende a yega di fungi como vocero di polis suplente,  no ta kere cu e maneho aki tin su impacto positivo, ya cu e casonan di violencia domestico no a disminui.

 

Impacto psicologico

Encuanto si e tipo divulgacion di caso di violencia domestico den media tin un impacto psicologico cerca e victimanan, sr. Larmonie a precisa cu e  no ta un experto riba e tema specifico aki. “Bo mester un criminologo of un sociologo pa bisa bo esey.” Sinembargo e  ta pensa cu e no tin niun componente psicologico den dje. “Sea cu ta sali den corant si of no, acto di violencia ta tumando luga”.

 

E ta bisa esey, pasobra nan  tin varios aña caba cu e parti di maneho di mando di cuerpo policial di no saca e tipo di informacion aki den prensa, ya cu e tin di haber cu problema familiar. Pero apesar di e maneho aki, violencia domestico ta sigui sosode  y hopi, segun sr. Larmonie.  E ta pensa cu no ta existi un link entre divulgacion di informacion rond di violencia domestico y aumento di casonan relaciona cu e problematica aki.

 

“E factornan cu ta hiba na  e violencia den famia ta keda persisti den e casnan tog. Sea cu e ta keda sali den prensa si of no, e ta keda persisti toch. Mas bien e ta haya cu hopi biaha no ta existi e yudansa necesario, ya cu e famia mester haya guia.

“E echo cu specialmente e hobennan den cas no ta haya cierto informacion  el a para bira awor como si fuera cu gobierno ta esun cu mester yena e buraco cu e mayornan ta laga habri. Tin biaha e mayor envolvi den e tipo di problema aki no tin yudansa pa nan mes, corda nan bay siña nan yiunan”. Riba e tereno aki polis ta haciendo hopi esfuerso dunando lectura den scolnan y papia cu muchanan dor di violencia y efectonan  negativo di dje. Tambe nan ta papia riba e miho forma cu nan por resolve e problema.

 

Mas peliger den cas cu afo

Igualmente sr. Larmonie a laga sa cu masha preocupacion cu den nucleo di famia ta existi mas factor di violencia  cu riba caya. “E ta algo sorprendente. Ami ta haciendo mi investigacion pa asina trece informacion ariba tema di violencia den mi lectura. Pero tambe di atraco y bida di gang, ami  mes a keda hopi sorprendi ora cu ami mes a topa cu e factor ey. Pero e no ta algo cu ta na  Aruba so, sino cu e ta algo mundialmente.” Si  bo ta tuma e cantidad di caso di violencia cu ta tuma luga den seno familiar of den casnan di famia, e ta asina halto cu nan a denomina e cas di famia e luga mas peligroso basicamente pa un  ser humano.

 

“Tin mas acto di violencia cu ta tuma den casnan di famia cu riba caya mes”. E ta algo –segun sr. Larmonie – cu ta pone bo para keto un rato y medita ya cu “nos ta hopi leu fei cas”.

 

Reformacion

Un factor importante ta  e parti di informacion y formacion, pero te hasta e reformacion den nos comunidad pa e hendenan cuminsa actua di un manera di resolve nan problema familiar of domestico di un forma mas pacifico. E transformacion mester cuminsa na cas mes, ya cu hopi biaha nos ta mirando un generacion cu ta lantando y cu ta birando cada biaha mas violento. Pero ora cu nan ta bay check e fuente cu ta influencia nan pa bira mas violento sorpresivamente mayoria di nan no ta na scol, ni riba caya, segun sr. Larmonie.

 

“Hopi biaha e echonan di violencia loke ta forma nan caracter y falta di pasenshi,  ta e echo cu nan ta bira agresivo lihe, hopi biaha nan ta siñ’e na cas.”  E ta haya  cu esaki ta un lastima, ya cu hopi biaha esunnan cu mas mester di informacion aki ta esunnan cu no ta atende e tipo di charla organisa entre otro pa Fundacion Hende Muhe den Dificultad (FHMDD).

 

Sr. Larmonie ta ripara cu ora e ta bay duna su charla di conscientisacion  y prevencion na scolnan ora cu tin e anochi di informacion, un di esunnan cu mas falta ta e mayornan. “Y ora cu nos ta papia di violencia domestico, esunnan cu menos ta bin dilanti ta esunnan cu mas mester di informacion cu ta e mayornan mes.”

 

Recientemente Sr. Larmonie a participa di un charla organisa pa FHMDD en conexion cu nan campaña “Orange Aruba”, unda  un grupo di oradonan masculino a duna nan punto di bista di ser masculino riba e problematica di violencia domestico. Bon Dia Aruba a trece dilanti cerca Sr. Larmonie cu si stigmatisacion  ta wordo crea rond di hende homber, caminda nan ta wordo pinta como un fuente of autor principal di violencia domestico.

 

E ta bisa cu nos no mester desconoci cu nos tin un problema di violencia . “E tin di haber cu nos cultura. E manera cu nos ta wordo cria. Fei di chikito nos ta wordo bisa hopi biaha cu si un hende ta falta bo respet bo no ta tum’e, bo ta dal’e.” Den caso di hende muhe nan ta pidi yudansa, e ta wordo yuda mas lihe “pasobra e ta un hende muhe cu mester protege. Segun nos cultura y nos manera di wak, e ta haya yudansa mas lihe cu hende homber”.  E ta agrega cu den nos cultura ora cu hende homber ta pidi yudansa, e reaccion ta: “Homber bo ta! Bo mester ta fuerte, bay defende bo mes”.  

Sr. Larmonie a conclui cu fei chikito caba mucha homber ta wordo siña cu violencia ta aceptabel; y cu bo tin cu uz’e pa defende bo mes, siendo cu esey no meter ta e caso.