Aruba Hospitality & Security Foundation (AH&SF) ta un partner di Cuerpo Policial pa algun aña caba. E fundacion aña pasa a provee 50 vest anti-bala pa Cuerpo Policial y recientemente a entrega 150 vest mas na Alto Comisario mr. Adolfo “Dolfi” Richardson.
“E proyecto di vestnan ta un parti di e plan grandi pa ekipa e unidadnan di Cuerpo Policial cu materialnan y ekiponan necesario,” Comisario Richardson a laga sa. El a splica cu e cooperacion cu AH&SF ta encera pa di parti di Cuerpo Policial pone mas agente policial na disposicion di e area turistico, y Aruba en general, y di parti di AH&SF ta provee materialnan pa Polisnan eherce nan trabao.
CEO di Aruba Hotel and Tourism Association (AHATA) Jim Hepple, kende tambe ta forma parti di e directiva di AH&SF, a bisa cu nan ta contento di por provee Cuerpo Policial cu e vestnan anti-bala pa asina e polisnan ta sinti nan mes mas sigur riba caya. E decision ki materialnan y ekiponan ta un prioridad y kico ta e miho materialnan pa adkiri, ta uno cu ta wordo tuma hunto cu Cuerpo Policial.
Despues di reuni pa repasa e lista di necesidadnan, prioridadnan ta wordo stipula y AH&SF ta pone e fondonan disponibel.
Alto Comisario Richardson ta agrega cu Cuerpo Policial ta contento cu e 50 vestnan cu nan a adkiri aña pasa, y despues di a uza nan pa algun tempo y test nan e coleganan a haya nan hopi adecua, e material ta bon y menos pisa cu esun di e vestnan cu nan tabatin anteriormente; pues e vestnan ta sigur y mas comodo.
Consecuentemente a trece 150 vest mas y lo tin mas na caminda, como cu e intencion ta pa tur Polis haya un vest anti-bala nobo.
