Agente di polis Eric Ras a duna su banda di medaya pa loke ta declaracionnan haci contra su persona di parti di doñonan di Circle K. E agente a desmenti cu polis tabatin interes special pa haci cu e establecimento lo a cera.
Algun siman atras nos a publica un declaracion di parti di doñonan di Circle K unda nan a conta di e manera con Circle K a wordo cera. Segun e ultimo declaracion di parti di un di e doñonan, Tatiana Eman, el a expresa cu den su perspectiva un polis, Eric Ras, tabata parce di tin algo en contra laga Circle K habri. Den e ultimo articulo cu nos a publica nos a presenta banda di medaya di sra. Eman pero nos no a logra haya comentario di sr. Ras e tempo ey.
Cambio di compania y doño sin renoba permiso
Sr. Ras a declara na Bon Dia recien cu en berdad Circle K tabata habri desde aña 1991 bou Circle K Aruba N.V. Segun sr. Ras un negoshi manera Circle K solamente ta bin na remarca pa un slijtvergunning. E permiso aki ta duna un tienda e derecho pa bende alcohol pero cu e limitacion cu e alcohol no mag di wordo consumi den e establecimento. E orario cu e tienda tin pa por bende alcohol e ora ey ta maximo te 9’or di anochi. P’esey den un gran cantidad di supermercado riba nos isla e doñonan ta pone advertencianan den nan supermercado cu nan no mag di bende alcohol despues cu 9’or.
E agente di polis a sigui conta cu Circle K N.V. a wordo bendi na 2004 pasobra e N.V. aki a bay failliet e aña anterior den september. Pues ora e doñonan nobo a bay habri e luga bek bou nomber di compania Cocolishi Gift & Drugstore N.V., nan a sigui opera di manera normal aunke segun sr. Ras nan nunca tabatin permiso pa bende alcohol.
“No ta paso bo a cumpra un negoshi bo automaticamente tin e permiso cu e otro negoshi tabatin. Ora bo cumpra un negoshi bo tin cu haci tur e tramitenan di nobo. Ora cu mi a haya sa cu e N.V. bieu no ta existi mas mi a bisa e doñonan nobo cu nan mester bay regla e cuenta di permisonan. Eynan e problema a cuminsa.”
Orario di tienda ta cay bou Asuntonan Economico
Segun sr. Ras e doñonan a haya un lapso di tempo pa por regla e papelnan, pero locual ta encera keda habri pa cierto orario no ta cay bou di polis, si no bou Departamento di Asuntonan Economico. Sr. Ras a conta nos cu el a papia cu e departamento y nan a bis’e cu e permiso cu nan ta duna ta maximo te 12’or di anochi, pa un tienda opera. “Nan a bisa cu nan no ta duna niun hende permiso pa opera 24 ora pa dia pasobra si no e cos ta bay for di man.”
Na e momento ey sr. Ras a splica cu el a dicidi di hala atras y no mete den e asuntonan cu no ta coresponde na su departamento. Sinembargo den sra. Eman su declaracion el a indica cu e doñonan di Circle K (bou nomber di Cocolishi Gift & Drugstore NV) a sinta hunto cu sr. Ras, Eric Soemers y hefe di polis Dolfi Richardson pa por bin na un acuerdo pa por keda habri 24 ora pa dia pa un trial period. Sra. Eman a splica cu e trial period aki a wordo duna pa 6 luna pero cu polis a laga nan na caya.
Pero loke sr. Ras ta conta ta cu polis a dicidi di no mete den asuntonan di e otro departamento, cual a dicta cu nan no ta duna permiso pa opera te mas laat cu 12’or. Sinembargo nos ta tuma nota cu si tin un supermercado cu den pasado tabata keda habri pa 24 ora den dia, esta Shap, situa na Paradera banda di Subway. Sr. Ras di cu ‘cu nan ta haci’e nos no por descarta’. Sinembargo polis a yega di bay varios biaha na e supermercado aki y inicia un proces-verbaal pasobra nan no ta tene nan mes na ora di cera.
E punto cu sr. Ras a comprende di e departamento ta cu nan no ta duna ningun permiso pa habri 24 ora pa dia pasobra e ora ey tur lo bay pidi esaki y lo haci e control pa negoshinan wanta nan mes na bende alcohol te 9’or hopi dificil pa polis. “Nos ta haya dificultad pa tin wowo tur caminda y controla tur caminda. E supermercadonan Chines ya caba ta keda habri te laat y sigui bende alcohol sin mag. Alabes hopi polis ta trahando masha hopi overtime. Si lo tin permiso pa keda habri 24 ora, sigur nan lo abusa di dje y bende alcohol round the clock tambe.”
Un otro punto cu sra. Eman a trece dilanti tabata cu tabata parce manera polis tabata ter Circle K specificamente na luga di bay persigui crimen den area di Oranjestad y specialmente Rancho. Sr. Ras a splica cu ‘Oranjestad, cual nos conoce como distrito 1, ta un di e districtonan mas druk pa trabou di polis’. Si polis lo mester manda extra atencion pa Circle K esaki lo no ta posibel pa nan.
Sr. Ras a conclui di su banda cu, “e hendenan ki kier hustifica di algun manera cu nan negoshi no por a keda habri 24 ora pa dia mas. Pero loke a wordo treci dilanti no ta cuadra”.
