Polis preocupa pa organisacion di actividadnan ilegal cu aglomeracion di hende

Diasabra den oranan di anochi, comunidad di Aruba a conoce cu un grupo di persona a organisa un actividad di ‘Off Road’ ilegal na algun luganan di Aruba, y cu Polis mester a actua, pa motibo cu ningun di e autonan aki tabatin nan papelnan na ordo y pa evita aglomeracion di hende.

Ademas di esaki, comunidad ta hayando mas casonan positivo pa Covid-19 y esaki no ta un manera mas efectivo pa evita transmision.

Pa cu esaki, Cuerpo Policial di Aruba y su vocero Lito Lacle a informa pa Bon Dia Aruba cu nan a confisca 3 auto cu no tabatin ningun tipo di papel y 7 ATV cu UTV cu a wordo hiba pa diferente warda di polis. Tambe a sigura cu diasabra ultimo practicamente tur unidad di Cuerpo Policial, incluyendo motor unit, tabata presente den e area y cu mester a wordo usa pa por a controla e denomina Off Road aki sin permiso, cu a tuma luga entre otro usando e parti panort di e isla, como Bushiribana.

Cuerpo Policial a haya informacion cu ayera diadomingo atrobe tabata organisando un otro Off Road den oranan di anochi. Pa e motibo aki lo tabatin extra personal ariba caya pa controla y stop esaki, como tambe purba di confisca mas vehiculonan cu ta posibel. Si nan no tabatin nan papelnan na ordo y si nan no core manera mester ta, Lacle a comenta cu Polis tambe por confisca e autonan si Ministerio Publico duna nan e autorisacion.

Nan a haci un yamado pa comunidad den general tene cuenta cu organisando un actividad manera esaki sin permiso por tin como consecuencia cu nan vehiculo por wordo confisca. Ademas, e persona lo haya un multa. Ora un vehiculo ta keda confisca lo nifica tur e costo pa takel e auto, brommer, UTV, ATV etc. ta bay pa e doño.

Di mesun manera, Lacle a menciona cu Cuerpo di Polis ta preocupa pa via di mal comportacion di personanan pa organisa actividadnan di e sorto aki, cu ta trece mas aglomeracion di hende na un momento cu casonan positivo pa Covid-19 ta sigui aumenta dia pa dia.

“E grupo aki no ta teniendo na cuenta ni un di e protocolnan di DVG y nan ta poniendo den riesgo e salud di hende, bebiendo uno cu otro. Na dado momento tur esakinan por tin consecuencianan pa nos despues” Lacle a finalisa.