Den cuadro di e campaña nobo cu e organisacionnan turistico conhuntamente cu otro partnernan a lansa ayera, polis tambe lo participa. Y nan a indica cu lo bay actua contra personanan cu lo destrui beachnan y duinnan, te hasta duna boet cual por ta basta halto.

E agente policial di warda di Noord, Gerald Maduro ta bisa cu cuerpo policial (KPA) ta comprometi pa protege nos medio ambiente.  No ta di awor cu nan tin mira riba medio ambiente di Aruba completo, e ta bisa.  For di dos aña pasa nan ta poniendo extra atencion riba nos beach, lama y duinnan. For di cuminsamento di aña 2000 caba tur agente policial ora cu nan ta finalisa nan studio nan mester pasa door di un proyecto grandi pa trece mehoracion of conscientisa basa ariba nos medio ambiente.

Sr. Maduro a bisa cu a bin cu cierto cambio y reglanan pa mehora e proteccion di nan ora cu tin actividad riba nos beachnan pa minimalisa e dañonan.

P’esey  KPA ta entusiasma pa participa den e proyecto di instalacion di borchinan cu e reglanan pa protege nos medio ambiente,  hunto cu ATA, Ahata y otro partnernan. No pa duna boet so, pero pa conscientisa, segun sr. Maduro. E ta laga sa cu semper tabata asina cu si un hende tin un preocupacion riba destruccion di nos medio ambiente ta yama polis pa tuma accion. E maneho aki ta continua asina keto bay y pa tal motibo nan a uni na e campaña aki.

Boet di 10 mil
Tin diferente articulo cu ta para den ley pa tur hende ta consciente cu e no ta solamente un campaña di conscientisacion; sino cu nan por core e riesgo di haya boet pa un balor maximo di 10 mil florin. El a agrega cu tin instrumento legal suficiente pa castiga un persona cu ta ocasiona daño na nos beach, duinnan. Como polis nan por duna un boet of sancion. E boet ta depende di loke Ministerio Publico (OM) ta impone como sancion a base di e violacion di e reglanan.  

Astrid Muller di Ahata a pidi pa tur hende tanto turista como local respeta e reglanan cu ta poni riba e borchinan cu lo wordo instala rond di Aruba pa conserva y protege nos medio ambiente. Den caso cu un ciudadano ta ripara cu tin hende cu no ta respeta e reglanan, libremente por tuma contacto cu polis, tambe ATA y Ahata riba dje. “Informa polis, ATA of Ahata kico boso nan ta wak, si tin destruccion di nos vegetacion, destruccion di nos duinnan y pa conhuntamente nos por cuida nos medio ambiente”, esaki ta e solicitud cu sra. Muller a haci.