(NLTimes) – Polis na Tilburg na Hulanda ta bay haci uso di un drone pa ubica unda ta usando klapchi pisa.
E drone ta un experimento pa mira si por us’e exitosamente durante servicio. Polis a manda e aparato, particularmente durante festival y manifestacionnan, pa yuda duna agentenan un bista di e situacion.
E tin un camara di calor cu por mustra polis unda un grupo di persona ta reuni hunto. E drone no ta saca potret den cual por reconoce e cara di e hendenan cu ta captura. “Nos no tin autoridad pa adresa gruponan y pidi nan habri nan tas. Nos mester gara hende den acto di cende klapchi pa confronta nan”, un vocero di unidad Zeeland-West-Brabant a bisa e Brabantse Dagblad.
E drone no a captura ningun actividad ilegal durante su test riba diahuebs. “Por ta medidanan preventivo a traha bon”, e vocero a bisa.
Cuerpo di polis ta usando dronenan continuamente. Mientras cu na 2017 tabatin apenas dies drone operacional den cuerpo di polis, pa 2020 e cantidad a aumenta na 790.
Polis na Zeeland-West-Brabant tambe dentro di poco ta bay lansa un number special di WhatsApp unda residentenan por reporta klapchi. Durante e dos dia cu e number tabata habilita na caminda pa ultimo dia di 2019 prome cu Aña Nobo, polis a ricibi 200 reporte di disturbio di klapchi na Tilburg.
