(AP) – Polis acompana pa activistanan di un grupo cu ta boga pa e derechonan di mucha a infiltra un tienda di reparacion di auto na frontera di India su capital riba diahuebs y a rescata 17 mucha cu tabata emplea ilegalmente.
Activistanan di Bachpan Bachao Andolan of Save The Children Movement, funda pa Kailash Satyarthi ken tabata un di e recipientenan di e premio di paz Nobel den aña 2014, a bay di tienda pa tienda, kitando muchanan kende su mannan, pananan y pianan tabata cubri den grasa di auto. E grupo ta yuda autoridad gara hendenan cu ta emplea muchanan hoben.
Muchanan bao di edad di 14 aña no tin permiso di traha na India cu excepcion di negoshinan di famia. Esunnan entre edad di 14 y 18 aña di edad ta prihibi di traha den condicionnan cu por ta peligroso of danino pa nan. Empleadornan por enfrenta te hasta 2 aña den prizon of un boet di 50,000 rupees cual ta un ekivalente di 675 dollar.
Den diahuebs su infiltracion, e muchanan, kendenan tabatin edadnan entre 13 pa 18, a ser kita pa e oficialnan di e gobierno di e distrcito. Polis a sera e tiendanan unda cu nan tabata trahando.
E ciere nacional di aña pasa impone pa causa di COVID-19, a pusha varios persona den pobresa, cual a encurasha e trafico di muchanan di pueblonan pa ciudadnan pa pone e muchanan aki traha. E pandemia tambe a interumpi e esfuersonan di implementa leynan anti labor di mucha, cu menos inspeccion den tiendanan y menos persecucion di hendenan cu ta trafica humanonan.
Manish Sharma, director di Save The Children Movement, a bisa cu e traficadornan y a personanan cu ta bende e hendenan aki a haya facil pa manipula e muchanan y e mayornan den e cambio di economia durante e pandemia.
“Hopi a keda sin trabao, y hopi tabata den riesgo di muri di hamber. E traficadornan a aprobecha di e situacionnan aki por completo,” Manish a declara.
Segun UNICEF, e agencia pa muchanan di Nacionnan Uni, e cantidad di muchanan trahando mundialmente a aumenta na 160 miyon den juni di 2021. El a adverti cu tin un cantidad adicional di 9 miyon cu ta den riesgo pa final di 2022 pa causa di e pandemia.
Riba diahuebs algun di e mayornan a aparece na e tiendanan aki despues di e infiltracion y a pidi e oficialnan y activistanan pa laga nan muchanan den libertad.
“E ta trahando duro, toch? E no ta hortando, ni humando marihuana, ni bebiendo alcohol,” e mama di un di e muchanan a expresa. El a bisa cu e unico motibo dicon el a permiti su yiu traha ta pa motibo cu scolnan ta cera y tabata gastando su tempo haciendo nada.
Sharama a bisa cu rehabilitacion di e muchanan rescata ta crucial. E empleadornan anterior lo mester paga e salarionan y tarifanan cu nan no a paga, y e muchanan lo ser yuda den obtene varios beneficio di gobierno, incluyendo inscripcion pa scolnan.
