(AP) – Polis a identifica e asesino cu a staca 6 persona mortalmente na un centro di compras na Sydney prome cu el a fayece a causa di tiro di oficialnan.
New South Wales Police a bisa diadomingo cu Joel Cauchi di 40 aña tabata responsabel pa e atake di diasabra atardi na Westfield Shopping Centre na Bondi, den e ciudad su parti cu no ta leu di e lama famoso Bondi Beach.
NSW Comisionado Assistent di polis, Anthony Cooke a bisa reporteronan na un conferencia di prensa diadomingo cu Cauchi tabata sufri di problemanan di salud mental cu no a keda specifica y investigadornan no tabata tratando e incidente como un caso relaciona na terorismo. “Nos lo sigui traha riba e perfil di e sospechoso pero ta hopi cla pa nos cu na e etapa aki e ta aparenta cu ta trata di problemanan di salud mental di e individuo involucra,” Cooke a declara.
“Te cu awo, te ainda ningun informacion cu nos a ricibi ni e evidencia cu nos tin recupera, ni inteligencia cu nos a reuni ta sugeri cu esaki tabatin algun motivacion en particular of ideologia,” el a agrega.
E incidente na e centro di compras, un di esnan mas druk den e pais y cu ta un punto di actividad riba un atardi particularmente cayente, a cuminsa alrededor di 3or di atardi y polis a ser yama rapidamente.
6 persona, di cual 5 tabata muhe y un homber di entre 20 pa 55 aña di edad, a ser asesina den e atake y 12 otro ta herida den hospital, incluyendo un mucha di 9 luna ken su mama a fayece durante e atake. 2 di e 6 victima tabata di exterior y no tin famia na Australia, Cooke a informa diadomingo.
