Dialuna polis tabata purba di controla cu gas lagrimogeno e avance di e Venezolanonan, cu tabata participa den e marcha riba autopista di Caracas. E marcha aki ta e di cinco protesta di oposicion, cu a ser organisa den luna di april, contra gobierno di presidente Nicolas Maduro.

Manera a sucede den diferente manifestacion cu a tuma lugar den e dianan anterior, e grupo di oposicion a bay desde tempran na un punto di zona este di Caracas y ey nan a cuminsa nan marcha contra gobierno. Ayera e punto di concentracion tabata na plaza Brion, na Caracas.

Cerca di autopista Francisco Fajardo, polis specialisa anti-motin a lansa desde un brug gas lacrimogeno pa asina impedi e avance di e manifestantenan. E destino final di e manifestantenan di oposicion no a keda cla, pasobra organisadornan no a duna informacion tocante e punto ey.

Un grupo di hoben cara tapa a kibra e sistema di proteccion banda di caminda , pa asina haya piedra y lansa nan directamente contra polis. E gas di polis tabata bin desde un edificio di gobierno te na e pueblo cu tabata protesta. Presidente Maduro cu ta na La Habana, Cuba, pa motibo di un reunion di canciyernan cu ta pertenece na e ‘Aliansa Bolivariana para los pueblos de Nuestra America (ALBA), a declara como dianan liber henter siman di Semana Santa, pa hende cu ta traha den sector publico.

E protesta di ayera tabata di cinco protesta di oposicion den ultimo 10 dia, cu obhetivo di exigi eleccion general, como tambe respet pa autonomia di parlamento, y liberacion di preso politico. E manifestacion anterior tabatin como saldo un persona cu a fayece y hopi hende herida y cu a keda deteni, como tambe daño na sede di Tribunal Supremo di Husticia (TSJ) y na cuartel general di ex-candidato presidencial Henrique Capriles. Capriles a ser inhabilita pa participa den eleccion di posicion publico, durante 15 aña pa un decision cu a bin for di contraloria general di Venezuela.

Stalin Gonzalez, hefe di oposicion den parlamento, a bisa cu lo tin actividad di caya durante henter Semana Santa, y el a sigura cu pueblo lo continua riba caya”. Capriles a denuncia riba su cuenta na twitter cu gobierno a cera varios caminda na Caracas, pa asina no permiti cu manifestacion di ayera por a avansa. E situacion ey a haya hopi critica, di hende di oposicion cu a organisa e manifestacion.

Metro di Caracas, empresa publico di transporte na Venezuela, a skirbi riba Twitter cu a cera 18 stacion y 19 ruta di metro, como medida di proteccion pa usuarionan, personal cu ta traha na metro y tambe pa protege nan instalacion. Pero oposicion a denuncia cu regimen di Maduro a purba di paralisa e transporte pa asina no permiti cu manifestantenan por a mobilisa pa e marcha ey.