Ayera diabierna, medionan di comunicacion a wordo invita pa un conferencia di prensa di Sindicato di Polis Aruba (SPA) pa trece dilanti informacion di un reunion cu nan a haci cu miembronan di cuerpo policial cu caracter di urgencia, pa papia tocante e malcontento cu ta existi den departamento pa loke ta trata e recorte den salario di e trahadonan.

Jose Dirks, presidente di sindicato, tambe a señala loke a sali publica di Sindicato SIWA (Sindicato Independiente WEB Aruba), caminda cu nan a trece dilanti cu 19 compania estatal no ta contribuyendo cu e Fondo di Asistencia Social di Emergencia (FASE) y cu nan si ta parti di esunnan cu tin cu sacrifica pa colabora cu esey.

“Esey ta mustra duidelijk cu Gobierno no ta transparente cu nos y nos kier un claridad riba esaki”, Dirks a menciona.

Pa via di esaki, miembronan di Cuerpo di Polis a exigi sindicato pa tene un reunion, pa locual Dirks a comenta cu nan como sindicato tin constantemente contacto cu sindicato di Polis di Antis, cu cual nan ta intercambia informacion y ideanan di cosnan cu ta pasando. Igualmente el a informa cu nan a haya sa for di sindicato di Corsou y sindicato di Antias completo cu ni un florin a wordo kita di nan salario, al contrario, nan ta hayando un subsidio di calamidad di 75 florin pa dia.

Den otro palabra, nan ta cobra nan salario completo, subsidio di calamidad y overtime, algo cu loke nan como parti di Cuerpo di Polis di Aruba cu ta cay den mesun reino y e mesun landspakket ta puntra dicon ta haci un excepcion cu nan y kita 12.6% di nan salario.

Den e reunion, a bin dos mocion segun loke Dirks a indica. Un ta trata cu miembronan di cuerpo di polis a pidi sindicato pa traha un carta y manda esaki na secretario di Estado Hulandes pa Asuntonan Interno y Relacionnan di Reino, Raymond Knops, caminda nan ta exigi pa haya sa e motibo pakico mester corta den salario di polisnan di Aruba, mientras cu na henter Antias no ta haci mesun cos.

Di dos mocion ta un carta traha pa Ministerio di Husticia, den cual nan ta exigi pa haya informacion ki tempo e subsidio di calamidad lo wordo paga, pa motibo cu for di basta luna caba segun Dirks a sigura, minister di Husticia, Andin Bikker a bisa nan cu frontliners lo haya un subsidio; pero cu te dia di awe esey no a tuma luga.

Den e carta aki, miembronan ta exigi pa bin cu ultimatum te dia 10 di december y si e dia ey nan no haya contesta di Gobierno, den temporada di fiesta aki polisnan lo bay walk out.

“Nos ta bringando pa nos derechonan, nos a wordo discrimina y nos ta exigi claridad pa loke ta trata e cortamento di salario pa nos na Aruba”, Dirks a finalisa.