Mayor Alex Pieters di Unidad di Motor di Cuerpo Policial ta bisa Bon Dia cu polis lo controla mas estricto riba e maximo di peso cu trucknan por transporta, cual por ta algo castigabel si surpasa locual ley ta bisa. Esaki den cuadro cu varios truck cu a yega di bolter caba riba caminda entre otro pa motibo di sobrepeso den carga.

Den un entrevista cu sr. Pieters algun dia pasa el a comparti cu nos cu pa casualidad e departamento di Unidad di Motor/KPA tabata papiando riba e tema aki pa intensifica control di peso cu trucknan ta carga. “Aña pasa tabata tin dos caso di trucknan cu a bolter y nos ta ripara cu e trucknan aki ta transporta cierto material na un manera iresponsabel”, sr. Pieters ta bisa.

Ora di carga e truck, polis ta ripara cu nan ta pasa e peso maximo. E manera cu ta carga e truck tambe cu varios cos ta pone cu e truck ta perde su balans caba. Pues for di prome cu bo cuminsa core, si no load up bon bo ta perde balans y no por reacciona den trafico manera debe ser. Polis ta bay cuminsa un proyecto unda por check di adelanta caba e pesonan cu bo ta wak constantemente di trucknan coriendo riba caminda, lo por busca esaki ki ora cu ta riba internet pa haya sa e peso. Anto e ora polis por wak e material, ekipo of cosnan cu nan ta transporta, a base di esey ta haci e formule anto e ora ey por wak caba cu ta pasa e maximo. Pa e trucknan chikito cu hopi biaha ta pasa rand over di baki cu santo of otro cos segun sr. Pieters, tin companianan ki cu tin ekiponan pa pisa e trucknan aki na Barcadera. Ora cu constata cu un tal truck ta pasa e maximo peso, por hib’e e luga pa e pisa e truck. Si pasa e maximo peso e ta haya un proces-verbaal.

Ley
Den nos leynan di trafico ta papia di un maximo peso di 50.000 kilo cu un truck por transporta, e peso total di e truck plus su carga. Pues hopi ta pensa cu nan por bay cu tur cu tin tanten cu no pasa e 50.000kg segun sr. Pieters. Si bo truck ta traha pa transporta 20.000Kg, bo no por yena esaki cu 30.000 keriendo cu bo ta menos cu e maximo velocidad anto esaki ta tolerabel. Pues e unidad di motor ta dialogando pa cuminsa controla esaki pasobra si pasa e maximo peso cu bo vehiculo por carga, e ora ey ta castigabel pa e kapstok artikel den ley. E echo cu bo tin e chens pa causa un peliger pa otro trafico riba caminda. Pa motibo cu bo a pone carga demasiado pisa of grandi, anto e ora ey bo ta bira un peliger. “No cu bo pasa e maximo di ley, pero e maximo cu e truck por transporta y bay cu ne. Esey nos a ripara varios biaha cu e trucknan cu a bolter. Cu nan no ta trucknan grandi, pero a yena esakinan demasiado yen anto henter e balans ta cambia e ora ey”, sr. Pieters ta bisa.

Control riba trucknan di carnaval
Den e periodo aki cu ta e periodo di carnaval, polis a tuma nota cu hopi truck a yena cu trailer cu speaker, borchinan di propaganda etc. “Nos ta bay haci control riba esakinan tambe pasobra nos tin maneranan cu nos por midi. E maximo haltura antes tabata 3 meter 60, el a subi awor pa 4 meter 20. Mester tene cuenta cu no ta tur caminda Elmar a logra pa cambia y hisa e wayanan.” Locual ta pasando ultimo cu algun truck bayendo carnaval ta cu e haltura ta corecto pero ta yena esaki cu extra speaker cual ta pone cu lo pasa e maximo haltura. E hanchura tambe ta 2 meter 60, unda cu si tin algo cu mester sali na banda e no por sali mas cu 20 centimeter. Tin trailer cu tin cosnan ta sali te casi 1 meter of mas na banda. Mester pidi permiso pa un escort di polis pa por transporta e tipo di trailernan/trucknan aki den caminda publico segun sr. Pieters. Pa locual ta e trailernan cu ta wordo poni na e trucknan den carnaval, trailernan riba 400Kg sigur mester tin su luznan adecua, luz di brake/reverse y mester cumpli cu ley. Tur locual ta riba 400Kg como trailer mester cumpli cu tur exigencia di ley. Sr. Pieters: “Locual nos ta haya hopi falta di dje ultimo tempo, nos ta wak e trailernan grandi pero nos no ta wak e luznan, nos no ta wak e luz e di brake/reverse. Tur esaki mester cumpli riba e vehiculo.”

En total ora pega un trailer, e vehiculo cu su trailer no mag di ta mas largo cu 15 meter.
Si pasa e maximo haltura of hanchura, mester tuma contacto cu Elmar/DOW. Tin truck cu ta pega trailer su tras y pega otro cos pa carga mas speaker, of carga ijs etc.; esaki ta pasa mas tanto den actividadnan grandi. Unabes bo haci esaki segun sr. Pieters, tur cos ta bay cambia di e truck; e manera di lora lo cambia y por trece hende den peliger. Ultimo añanan tin trailer cu ta asina grandi, cu ora di haci loradanan, polis mester hala baricada cu hende for di e area un rato pa e truck haci su lorada sin trece hende den peliger.

Riba nos pagina di web www.bondia24.com por mira un lista cu reglanan pa chauffeurnan cu ta bay core den temporadanan aki di carnaval pa tene cuenta y wak si tur midi di nan truck ta corecto. “Si esaki no ta asina nos ta tuma medida pa nan, y no ta pa stroba e actividad. Ta pa motibo cu nos tin cu bay actua pasobra bo ta trece trafico cu hende cu ta gosa di carnaval den un peliger cu no mester”, sr. Pieters ta bisa.