Ayera e polis Colombiano Albeiro Garibello Alvarado, un di 24 polis herida den e atentado cu explosivo riba diadomingo pasa, banda di e plasa di toro La Santa Maria de Bogota, a fayece, despues cu medico a diagnostica morto cerebral, autoridad a informa.
“E fayecimento di nos polis Albeiro ta un perdida pa nos institucion y pa e pais. Nos ta acompaña den dolor su famia y nos lo sigui trahando pa haya sa, kende a comete e atentando aki contra polis y pueblo”, general Jorge Hernando Nieto, director di polis a afirma. Despues di haya e noticia, presidente di Colombia Juan Manuel Santos a lamenta e fayecimento di e hoben polis di 23 aña.
“Nos ta sinti dolor pa fayecimento di polis Albeiro Garibello. Mi ta solicita un investigacion lihe y husticia pa e responsabel di e atentado”, Santos a afirma riba Twitter. Garibello Alvarado tabata hunto cu 2 compañero mas den unidad di cuido intensivo di hospital central di polis, pa motibo di nan heridanan cu nan a sufri den e atentado. Segun investigacion e atentado a ser ehecuta pa guerrillero di Ehercito di Liberacion Nacional ELN, den cercania di La Macarena.
“E polis cu a fayece a nace na Pasca, departamento di Cundinamarca y a drenta cuerpo policial 4 aña pasa. E tabata traha den e grupo mobil anti-disturbio, según comunicado di polis nacional. Den su curriculum e tin 35 pabien, como un reconocimento pa su bon trabao den polis” el a agrega. General Hoover Penilla a manifesta cu nan no lo bay sosega te momento cu por haya e suheto responsabel di e tristo incidente aki”. Den unidad di cuido intensivo di hospital ta permanece interna e polis Jhon Arley Herrera y Eimer Fidel Cubillos, kendenan ta den condicion stabil y ta continua den observacion, medico di hospital a comunica.
Cinco polis mas ta hospitalisa tambe cu diferente herida, pero stabil y sin riesgo. 16 polis cu a resulta herida, hunto cu dos civil mas, a bay cas caba cu condicion stabil.
