Den e dianan aki polis ta masha visibel y activo riba caminda cu nan control riguroso riba automobilistanan y dunando boet pa cualkier infraccion riba trafico.
Tin biaha nan ta wordo ubica strategicamente cerca di e tantisimo rotonde cu a wordo construi durante e ultimo añanan. Sinembargo hopi di nos automobilistanan ta bin ta hayando boet pisa, ya cu nan inocentemente nan ta desconoci cu e reglanan di trafico pa loke ta e coremento na rotonde, ya cu esaki ta algo practicamente nobo.
Vocero policial, Lito Laclé a declara na Bon Dia Aruba cu hunto cu Alex Pietersz, cuerpo di polis ta bay purba di hacie mas visibel posibel y pone riba social media pa asina nos comunidad por compronde con nan tin cu actua of comporta nan mes riba un rotonde.
“Nos ta hayando e reclamo aki basta hopi”, el a bisa. Sr. Laclé ta haya bon cu ora nan ta haya e feedback aki, como polis nan tin cu bay traha nan sistemanan pa purba splica e pueblo di Aruba con precies pa actua den un rotonde.
Denter di e dianan venidero nan ta bay haci uzo di social media y prensa pa atende cu e asunto aki. Ya caba nan a cuminsa via television pa splica con e persona mester comporta su mes riba rotonde. Mas cla ta pa nos automobilistanan esaki lo trece como resultado cu nan lo comporta nan mes como debe ser, segun e vocero policial.
