Den un comunicado cu nos a ricibi, Tatiana Eman, parcialmente un di e doñonan di negoshi Circle K ta conta e storia di banda di e negoshante con Circle K a cera. “Circle K ta un establecimento bon conoci na Aruba pa mas di 25 aña. Sinembargo, despues di 25 aña di operacion, Circle K a hay’e forsa pa via di autoridadnan pa cera su portanan temporalmente.” Nos a purba haya banda di polis pero no a logra te awo. Nos lo sigui riba e storia aki.

E comerciante ta splica cu pa via di e maneho di tolerancia di autoridadnan pa loke ta trata actonan ilicito cometi den e area di Rancho, Circle K tambe a haya un fama menos bunita. Mayoria di biaha cu un fechoria tuma luga den Rancho, Circle K su nomber ta aparece den prensa.

Sinembargo, segun sra. Eman, Circle K semper a coopera cu cuerpo policial. Tanto asina cu na peticion di polis, Circle K a instala camaranan di siguridad pafo di e establecimento pa asina polis por tin acceso ora ta necesario. Siendo Circle K e unico minimarket habri den oranan nocturno, polis a haya cu ta bon pa por wak kico tur ta pasa riba e caya banda di Circle K ora cualkier incidente sosode den Rancho.

E comerciante ta comenta cu tur cos tawata cana bon te dia 25 di december 2015, ora un polis, Eric Ras a dicidi cu mester cera Circle K despues di 12 or di anochi. Finalmente Circle K a cera pa parti madruga desde mas o menos maart di 2016.

“Segun Ras, Circle K a opera ilegalmente pa 25 aña pero t’e ta e persona cu a bin constata esaki supuestamente. Mientras tanto, durante e 25 añanan di existencia, Circle K a pasa door di 3 diferente propietario sin interupcion. Solamente a dicidi cuminsa cu haci problema, cu e ultimo doño cu ta esun cu mas a inverti den e luga. E argumento di Sr. Ras ta cu Circle K ta e actor y promotor principal di e fechorianan cu ta tuma luga den Rancho, y na luga di pone man duro riba e malhechornan pafo, el a prefera di pone tur e carga negativo ariba e establecimento”, e comerciante a bisa.


Inversion den Circle K
Un deseo di e maneho di e gobierno e momento ey, tabata pa tur comerciante den centro di ciudad upgrade nan mes pa asina tur duna un man na mehora producto Aruba pa turistanan. Circle K a tuma e deseo aki hopi na serio y a upgrade su exterior y interior considerablemente implementando entre otro pop art den su exterior.

Inversionnan considerabel a wordo haci pa aporta na e mehoracion di producto Aruba, cu e speransa tambe cu asina Cuerpo Policial tambe aporta di su banda pa medio di eherce man mas duro riba e malechornan den e area. Sin embargo esey no a resulta di ta e realidad, segun sra. Eman.

Manera 2016 a habri, e frecuencia cu autoridadnan tabata stop e operacion nocturno di Circle K a aumenta. Cu e intencion di pone tur cos na ordo, Circle K a sinta na mesa cu Ministernan di Asuntonan General, Salubridad, Economia y Husticia y a bay di acuerdo pa trece e permisonan anticua (cu pa 25 aña no tabata un problema) up to date pa asina por retoma e operacion usual.

Cera te 12 or di anochi
Mientras lunanan tabata pasa pa por haci esaki, Circle K tabata perde placa ya cu e operacion principal di Circle K ta nocturno. ‘Un negoshi manera Circle K no por competi cu un minimarket Chines por ehempel, esey no ta su negoshi’, sra. Eman a expresa. Mas leu ainda, a pesar di cu e autoridadnan concerni a duna un permiso temporal pa por sigui opera mientras cu e papelnan ta cana nan caminda. Sinembargo polis a sigui haci bida di Circle K dificil pa bisa cu e permiso temporal, firma pa 2 minister, no tin validez.

“E tabata hasta comico pa wak con polis ta sconde tras di mata di kwihi pa warda wak si Circle K ta cera su portanan 12am. Te hasta tabata bin un rato despues cu Circle K a cera cu polis a para wak cu flashlight den e establecimento si tin hende a keda aden ainda pa habri bek”. Esaki a haci cu segun sra. Eman hopi empleadonan a perde nan trabou na Circle K.

Negociacion cu autoridad
Seis luna despues e permiso actualisa por fin a keda cla. Adicionalmente, mester a haci inversionnan adicional pa por a cumpli cu rekisitonan cu 25 aña pasa no tabata existi. Unico cu a keda pendiente e momento ey tabata e firma di minister di Asuntonan General pa por habri 24/7 atrobe; manera a wordo palabra 6 luna pasa. Sinembargo, Circle K a haya otro baño di awa friu, segun sra. Eman: Nan a wordo informa cu ‘E firma pendiente di Minister van Algemene Zaken no por wordo duna pasobra e presion di polis pa mantene e establecimento cera den oranan nocturno ta mucho grandi’.

Na december 2016 a tuma luga un reunion entre e socionan di Circle K, sr. Ras, Alto Comisario Dolfi Richardson y hefe di warda na playa Soemers. E reunion aki a tuma luga na Centro di Husticia Santa Cruz. Segun sra. Eman, e tabata un reunion hopi ameno na unda Sr. Ras a bin cu e idea di laga Circle K habri bek 24/7 pa un trial period di 6 luna sin bende alcohol despues di 9pm.

Doñonan a sali satisfecho di e reunion sabiendo cu lo bay por habri Circle K bek 1 di Januari cu su actividadnan normal. Sinembargo segun sra. Eman, polis no a cumpli cu esaki y a laga e situacion manera cu e ta.

“Lunanan a sigui pasa y Circle K keto bay perdiendo placa. E moral di e empleadonan cu a resta a cay te na vloer ya cu despues di tanto aña ta traha amenamente pa Circle K.”

Medidanan di siguridad
Ya cu e bentanan di e negoshi no tabata duna pa un security guard; al contrario, empleadonan mester a wordo kita for di trabou, toch a busca un security guard pa para pafo. A haya un persona pa drumi den e establecimento. Sin embargo esaki no a dura mucho ya cu e ladronnan tabata kibra den Circle K asina mes y menasa e persona drumi. E ora a bin cu otro solucion: e doño mes lo keda den Circle K madruga, cu luz cendi haciendo trabounan administrativo.

Pa asina e ladronnan no cay den e tentacion di drenta horta. Sinembargo e polis a sigui bay tras di e negoshi, segun sra Eman. “A yega un Polis cu palabranan hopi insultativo e incorecto menasando e doño cu e si e no paga luz y bay drumi e lo wordo deteni. E doño a responde den un tono masha trankil y cortes cu e no por paga luz pasobra e ladronnan lo probecha y drenta horta atrobe; e ta prefera di wordo deteni contra su boluntad prome cu e laga e barco zink sin capitan a bordo.”

Segun sra. Eman, e polis no a haya otro solucion mas cu cana bay lagando solamente un monton di palabra malo atras. Di e echo aki e negoshi tin prueba riba camara, aunke e camaranan no tin audio.

Un luna despues no a resta e accionistanan otro solucion mas cu cera Circle K completo y manda e empleadonan cu a resta cas. ladronnan a sigui kibra y horta pero sin haya nada pasobra ya tur cos a wordo saca. “Polis a logra su meta di cera Circle K y laga tur e ladronnan free for all den nan teritorio di tolerancia”.

 Te hasta segun sra. Eman, Circle K tabata refugio pa hende cu tabata na punto di wordo atraca. “Circle K tabata esun cu ta yama Polis pa asistencia ora den e zona tabata tin problema. Dus cera e negoshi no a mehora e siguridad di e area y e persistencia cu a uza pa caba cu Circle K ta leu di esun cu mester aplica ariba e criminalnan di e zona”.

Nos no a logra haya reaccion di sr. Ras ni sr. Soemers riba e comentarionan aki. Nos a tuma contacto ayera cu warda di polis na Playa y nos a wordo informa cu sr. Soemers a bay duna les na scol di polis, y lo bolbe awe. Awe nos lo tuma contacto cu sr. Soemers pa asina clarifica e banda di medaya di polis.

Potretnan uza pa e articulo aki ta un combinacion di locual nos tin den archief y con e situacion ta actual.