(Infobae) – Polis Nacional di Colombia ta verificando e autenticidad di documentonan di inteligencia cu ta señala un supuesto plan di oposicion pa desestabilisa gobierno di presidente Petro.
E informacion, cu ta sugeri plannan di blokeonan y manifestacionnan politico, lo por tin relacion cu un intento di golpi di Estado. Debi na e situacion aki e director di Polis Nacional, general William Rene Salamanca, a indica cu “ta un informacion cu ta den proceso di verificacion.”
E presunto complot ainda no a ricibi confirmacion oficial ni a ser nenga pa autoridadnan gubernamental. E noticia a genera un clima di incertidumbre riba e stabilidad politico di e pais, y ta spera cu investigacionnan por aclaria e veracidad y alcance di e advertencianan.
Polis Nacional ta sigui traha pa determina e origen y intencionnan tras di e documentonan aki y asina por garantisa e siguridad nacional.
Colombia ta enfrenta varios problema socio-politico cu a aumenta e tension den panorama nacional, incluyendo debatenan tocante reforma proponi pa administracion di Petro. Den contexto aki, cualkier señal di instabilidad ta ser tuma cu seriedad pa institucionnan di Estado. E proximo declaracionnan di autoridadnan ta bay ta crucial pa compronde e situacion y medidanan cu ta bay tuma pa loke ta trata e rapportnan di inteligencia aki.
Segun un rapport publica pa Noticias Uno, diadomingo 14 di januari, ta existi plannan di oposicion pa desestabilisa e gobierno di presidente Gustavo Petro a traves di blokeonan y manifestacionnan politico.
Tambe ta indica cu ta existi un rapport di Inteligencia policial den cual ta indica cu gruponan di oposicion lo por ta organisando accionnan pa aña 2024, incluyendo e participacion di miembronan di reserva militar y asociacionnan contrario na Gobierno manera un Gran Marcha Nacional.
E documento tambe ta señala cu a dicidi cu como metodo di haci esaki publico ta bay usa avisonan na careteranan strategico cu frasenan contra e mandatario actual.
Autoridadnan ta keda den alerta pa cualkier señal di aumento di tension y ta traha pa garantisa siguridad y orden publico.
