Diamars un poco despues di 12or di marduga un bisiña atento na San Barbola ta yama central di polis pa informa cu un pickup Nissan shinishi a para banda di un cas y dos hende homber un bisti cu flanel cora y un otro cu flanel blanco lo a bula den e cura.
Di biaha central ta manda un patruya na e sitio. Na yegada di e patruya ta cuminsa controla den e cura y di berdad ta topa cu un homber bisti na cora. Di biaha ta solicita refuerso debi cu e cura ta grandi.
Mas patruya ta yega na e sitio pa asina cuminsa cu un buskeda pa e di dos persona pero no a logra haya e persona. Polis a puntra e sospechoso cu ken e tawata. E la bisa polis cu un tal Rafini cu lo a caba di sali for di Kia.
Polis a haya e sospechoso cu un machete den su poder. Tambe polis a haya e sospechoso cu un yabi di auto cu tawata para den e cura posiblemente pa horta e auto.
Polis a controla e pickup pero e number no ta cuadra cu e auto. Polis a confisca e auto pa mas investigacion. Polis a detene e sospechoso unda e tin cu bay duna cuenta cu ken e tawata y kico tawata nan intencion y tambe ki mish’e cu e yabi di e auto. Polis a tuma datonan y e doño di e luga lo bay haci denuncia.
