Coronel pensiona Cristian Labbé, ex-alcalde y ex-ministro di presidente y dictador di Chile Augusto Pinochet, a keda deteni dialuna ultimo pa su participacion den cuatro caso di tortura, na inicio di e regimen militar, polis a informa.
Labbé a presenta di manera boluntario na un warda di polis, cu ta situa na e mesun localidad unda el a ser eligi como alcalde di manera democratico entre aña 1996 y 2012. E awor ex-alcalde a keda deteni y ta wardando pa un traslado pa Temuco, na 700 kilometer sur di Santiago, pa un orden di hues Alvaro Mesa, cu a dicidi su detencion den un warda di polis di Araucania.
E ex-militar tabata responsabel pa e seguridad di Pinochet (1973-1990) y tabata un integrante di polis secreto durante henter dictadura y e tabata e ultimo vocero di e dictador Pinochet, na 1989 y 1990. Abogado Cristian Espejo a bisa cu su cliente ta victima di un persecucion politico y a bisa cu hende cu a cuminsa cu proceso di demanda a cay den testimonio contradictorio.
E ex-coronel ta envolvi den otro proceso tambe desde luna di october di 2014, pa e supuesto secuestro y tortura di 13 disidente na Tejas Verdes. Sin embargo hues di e caso aki a duna libertad provisional, despues cu el a paga un fiansa di 350 dollar. Un hurista specialisa den topico di violacion na derecho humano a bisa cu na Tejas Verdes ex-coronel Labbé no a haci tortura directamente, pero ora cu hende opositor tabata pasa den maltrato, anto Labbe tabata cana den e lugar ey dunando asesoria pa e torturanan, asina abogado Rodrigo Lledo a splica.
El a participa den formacion di persona cu hopi experiencia den interogatorio y tortura na Tejas Verdes. E lugar ey ta un warda cu tabata e cuna di direccion di inteligencia nacional, cu tabata considera como e prome y mas salvahe polis represivo di Pinochet.
Dictadura di Pinochet a produci mas di 3200 victima, entre hende cu a keda asesina y otro cu a disparce. Cerca di 37 mil preso politico a sufri di tortura.
