E parada di mucha na Oranjestad a start exactamente 2:00pm, manera planea adelanta dor di Polis y e organisacion SMAC. Tabatin 5 grupo den e parada, cu hunto a alcansa un total di 1170 participante. E prome grupo a yega final pa 6:10pm mientras cu e ultimo grupo a yega 6:55pm. Pa loke ta e envolvimento di Cuerpo Policial Aruba, a percura pa pone Polisnan uniforma disponibel, sosteni cu gruponan specialisa di Mobiele Eenheid, K-9, Polisnan motorisa, Recherchenan, personal den Commando Kamer y sin lubida e personal administrativo. Hunto nan a yega 111 Polis riba pia pa guia e parada den cayanan di Oranjestad.
Polisnan a haci hopi esfuerso pa den un maneho strategico, traha riba e medidanan di prevencion prome, durante y despues di parada. Mas presencia di Polis ta inspira mas trankilidad y esunnan cu un idea di haci malo ta pensa su mes bon prome.
Asina mes den algun caso specifico, mester a actua represivo y a detene e sospechosonan. Na tur ta solamente 3 detencion tabatin rond di e parada di mucha di Oranjestad, cu hunto a produci multanan cu a alcansa 750 florin. E detencionnan tabata debi na “wederspannigheid”, posesion di marihuana y no sigui ordo di Polis. E sospechosonan ta di 17, 22 y 35 aña di edad y tur ta hende homber.
Polis ta satisfecho cu e comportacion di publico, pasobra e resultado di e aña aki ta traduci su mes den 50% menos detencion cu aña pasa, unda a detene 6 sospechoso y a duna multa na balor di Afl. 1550,=.
E maneho di Ministerio Publico y Cuerpo Policial Aruba pa e temporada aki, conoci como “Faya bo Haya” y “Listramento Preventivo” lo sigui na vigor pa e siguiente paradanan di carnaval y eventonan carnavalesco.
