(AP) — Polis Belga a haci mas inval na oficinanan di Parlamento Europeo ayera, mientras presidente di e legislatura a priminti di habri un investigacion interno riba acusacionnan di corupcion, y e oficial top di Union Europeo a haci un yamado pa crea un cuerpo etico independiente na nivel di UE.
Fiscal investigando un acusacion di traficacion di influencia di un pais di Golfo den Parlamento Europeo a acusa cuatro persona durante weekend di corupcion, participacion den un grupo criminal, y labamento di placa.
Vice-presidente di Parlamento, Eva Kaili di Grecia a keda retira di su cargo durante weekend, expulsa for di grupo di Socialista y Democrata den e legislatura cu efecto inmediato.
Fiscal a nenga di identifica e pais sospechoso di ofrece placa of regalo na oficialnan di Parlamento a cambio di fabor politico. Varios miembro di e asamblea y algun medio di comunicacion Belga a vincula e investigacion na Qatar, cual actualmente ta anfitrion di evento gala di futbol, e Mundial.
Minister di Asunto Exterior di Qatar a rechasa e acusacion.
Polis a haci inval ayera na oficina di Parlamento Europeo na Brussels pa tuma den beslag data di computer perteneciendo na 10 assistent parlamentario, fiscalnan a bisa. Oficialnan a haci 20 inval den total como parti di un investigacion cu a cuminsa cuatro luna pasa.
“A tuma varios cienmiles di euro den beslag na tres diferente lugar: 600mil euro na cas di un di e sospechosonan, varios cienmiles di euro den un maleta tuma den beslag na un camber di hotel na Brussels, y como 150mil euro den un apartamento perteneciendo na un miembro di parlamento Europeo”, Fiscal a bisa.
Diabierna ultimo polis na capital Belga a haci varios inval como parti di e investigacion y a reporta cu a confisca placa cash, ekipo di computer y celular.
Oficina di fiscal federal, sin identifica ningun individuo, a bisa cu cuatro pa seis persona deteni e dia ey a wordo acusa subsecuentemente, y dos a keda liber.
Inval tambe a tuma lugar na Italia riba diadomingo.
