Pa medio di un comunicado di prensa, Cuerpo Policial ta informa:
Diasabra pa 4:00am a inicia e parada conoci como “Jouvert Morning” den cayanan di San Nicolas, cu 10 grupo musical of sistema di zonido participando. Polis a percura pa mantene orden publico prome, durante y despues di e evento, cu a caba den oranan di mainta. Un grupo di Polis a keda encarga specificamente cu control den trafico, pa sigura cu tur esunnan tras di stuur ta comporta nan mes drechi, ta tene nan mes na reglanan di trafico, ta tene e velocidad di acuerdo cu ley y specialmente ta evita di stuur bou influencia di alcohol.
Entre 6:30am y 10:30am cu a tene e control aki, Polis a efectua un total di 12 detencion. Di e cantidad aki, 2 tabata pa a causa accidente burachi, 1 a causa accidente y core bay siendo burachi, 7 pa motibo di tabata stuur auto burachi, 1 pa motibo tabata den posesion di droga y 1 no por a demostra un permiso legal di estadia riba nos isla, pa cual a entreg’e na Warda nos Costa pa verifica si e tin permiso sino regla su deportacion mesora.
E tipo di control asina lo continua mas ainda den e dianan nos dilanti, pa garantisa cu chauffeurnan ta tene hopi cuenta cu reglanan y specialmente evita stuur siendo bou influencia di alcohol. Por nota cu di e 12 detencionnan den trafico, 10 tabata pa stuurmento burachi, mustrando cu mayoria hende ainda ta risca nan mesun bida y di otronan dor di stuur despues di a consumi alcohol.
Corda semper pa sali cu Bo #amigoDIDI cu lo stuur pa Bo despues di e evento y percura Bo yega Bo cas sano y salvo.
